პოლიტიკა

ჩვენ გვინდა შევინარჩუნოთ მაქსიმალურად ერთიანობა, თუმცა ყველას უნდა მოვუწოდოთ, დაიცვან წესები - ირაკლი კობახიძე

პარლამენტის თავმჯდომარის, ირაკლი კობახიძის განცხადებით, მმართველი გუნდი შეეცდება, რომ გუნდის შიგნით ყველას აუხსნას, თუ რა წესი არ უნდა დაირღვეს.

პარლამენტის თავმჯდომარემ გასული წელი გაიხსენა, როდესაც უმრავლესობის დეპუტატებს შორის დაპირისპირება საბოლოოდ დავით ჭიჭინაძის გუნდიდან გარიცხვით დასრულდა.

ირაკლი კობახიძე აცხადებს, გუნდის წინააღმდეგ წასვლას არავის ურჩევს.

„თქვენ გახსოვთ შარშან ამ დროსაც კონკრეტული დეპუტატები უშვებდნენ შეცდომებს და ამ შეცდომებს გაეცა შესაბამისი პასუხი, თუმცა ჩვენ მაქსიმალურად ვმუშაობდით იმისთვის, რომ შეგვენარჩუნებინა ერთიანობა და ერთადერთი დეპუტატი, რომელსაც მოუწია უმრავლესობის დატოვება, მოგეხსენებათ იყო ვინც. შესაბამისად აქაც სულისკვეთება იქნება იგივე. ჩვენ გვინდა შევინარჩუნოთ მაქსიმალურად ერთიანობა, თუმცა ყველას უნდა მოვუწოდოთ დაიცვან წესები. ჩვენ ვართ მაქსიმალურად პასუხისმგებელი წესების დაცვაზე.

მე პირადად როგორც პარლამენტის თავმჯდომარე ვარ პასუხისმგებელი იმაზე, რომ თითოეულმა დეპუტატმა, განსაკუთრებით უმრავლესობაში დაიცვან წესები,“-განაცხადა კობახიძემ.

კითხვაზე - შესაძლებელია თუ არა ეკა ბესელიამ დავით ჭიჭინაძის მსგავსად საპარლამენტო უმრავლესობა დატოვოს, კობახიძემ განაცხადა:

„მე თეორიულ ვარიანტებზე ვერ ვისაუბრებ, მთავარია ყველამ დაიცვას წესები. ბიძინა ივანიშვილი ჩემს გვერდით კი არ დგას, ის არის ლიდერი გუნდის, შესაბამისად მე ვარ ამ გუნდის ნაწილი და ვიცავ იმ წესებს, რომელიც არის დადგენილი ამ გუნდის მიერ. არის ერთ გუნდი, მას ხელმძღვანელობს ბიძინა ივანიშვილი, როგორც გუნდის ლიდერი და არავის არ ვურჩევ ამ გუნდის წინააღმდეგ წასვლას.“