პოლიტიკა
ჩვენთვის უკრაინელებიდან არავის მოუმართავს - ზვიად კვაჭანტირაძე
ვინც ამ თემაზე სპეკულირება მოინდომა, უბრალოდ უსინდისოა, - ასე გამოეხმაურა ევროპის საპარლამენტო ასამბლეაში საქართველოს წარმომადგენელი, ზვიად კვაჭანტირაძე სოციალური ქსელით იმ ფაქტს, რომ საქართველოს დელეგაციამ უკრაინის კონფლიქტის შესახებ რეზოლუციების კენჭისყრაში მონაწილეობა არ მიიღო.
კვაჭანტირაძის განმარტებით, დღეს საქართველოს დელეგაცია უკრაინის დელეგაციის მიერ შემოთავაზებულ წერილობით რეზოლუციებს შეუერთდა.
ქართველი დეპუტატი ევროსაბჭოს საპარლამენტო ასამბლეაში უკრაინის წარმომადგენელთან, ნადია სავჩენკოსთან ერთად გადაღებულ ფოტოს აქვეყნებს და აღნიშნავს, რომ ამ რეზოლუციების მხარდაჭერის თხოვნით საქართველოს დელეგაციას სწორედ ნადია სავჩენკომ მიმართა.
,,ეს გახლავთ უკრაინელი გმირი ქალი, ყველასათვის კარგად ცნობილი ნადია სავჩენკო. იგი პირად საუბრებშიც ძალიან, ძალიან პოზიტიურ შთაბეჭდილებას ტოვებს. ამბობს, თუ პუტინი ისევ ომს დაიწყებს აუცილებლად შტურვალს დავუბრუნდებიო. ძალიან თბილი თანამოსაუბრეა. ვთანხმდებით, რომ წარსულის მახინჯ პრაქტიკაზე უარი უნდა ვთქვათ და ასამბლეაში ერთმანეთს არა პარტიული, არამედ სახელმწიფოებრივი ინტერესებიდან გამომდინარე აქტიურად უნდა დავუჭიროთ მხარი.
დღეს უკრაინის დელეგაციის მიერ შემოთავაზებულ წერილობით რეზოლუციებს შევუერთდით. სწორედ ნადია სავჩენკომ მოგვმართა თხოვნით და ჩვენც, რა თქმა უნდა, შევუერთდით’’, - აღნიშნავს კვაჭანტირაძე.
რაც შეეხება, გუშინდელ რეზოლუციას უკრაინაში ადამიანის უფლებების დარღვევის შესახებ, ქართველი დეპუტატის განცხადებით, საქართველოს დელეგაცია შვეიცარიის დელეგაციას ხვდებოდა და შესაბამისად დარბაზში არ იმყოფებოდა.
,,რაც შეეხება გუშინდელ რეზოლუციას, უკრაინაში ადამიანის უფლებების დარღვევის შესახებ, რაზეც ჭორიკნებმა ერთი ამბავი ატეხეს.
კენჭისყრის დროს ჩვენი დელეგაცია შვეიცარიის დელეგაციას ხვდებოდა და შესაბამისად დარბაზში არ ვიმყოფებოდით, ადამიანის უფლებათა და იურიდიულ კომიტეტზე კი უკრაინელების ყველა შესწორებას დავუჭირეთ მხარი და გუშინ რეზოლუცია სწორედ ისეთი სახით გავიდა, რასაც მხარი დავუჭირეთ კომიტეტზე. სავჩენკო დამეთანხმა, რომ უკრაინის დელეგაციას მეტი ორგანიზებულობა და აქტიურობა მართებდა კენჭისყრაზე მომხრეთა (მათ შორის ჩვენი) კონსოლიდაციისთვის. დიახ, ეს მიღებული პრაქტიკაა აქაც. ქვეყანა, რომელსაც ინტერესი აქვს საკუთარი რეზოლუცია გაიტანოს ამაზე მუშაობს აქტიურად. ჩვენთვის უკრაინელებიდან არავის მოუმართავს გუშინ არ გამოგვრჩენოდა კენჭისყრა დატვირთული დღის წესრიგის გამო. როგორც გითხარით არანაირი კონტაქტი არ ყოფილა, მაგრამ ზემოხსენებულ კომიტეტზე მაინც აქტიურად დავუჭირეთ უკრაინელებს მხარი ყველანაირი თხოვნის გარეშე. დღეს კი ნადია სავჩენკოს თხოვნასაც ასევე სიამოვნებით გამოვეხმაურეთ და წერილობით რეზოლუციებს მივუერთდით ჩვენი ხელმოწერებით.
ვინც ამ თემაზე სპეკულირება მოინდომა, უბრალიოდ უსინდისოა. იგი ცდილობს ამ თითიდან გამოწოვილი თემით გადაფაროს სტრასბურგში მიღებული უაღრესად პოზიტიური მესიჯები და მოლოცვები წარმატებულად ჩატარებული საპარლამენტო არჩევნების გამო. ამაზე სხვას ვეღარაფერს გეტყვით. აღარაფერია სათქმელი’’, - აცხადებს ზვიად კვაჭანტირაძე.
ნინო ექვთიმიშვილი