საზოგადოება

დამამცირებელი ტონით მეუბნება, რომ მე ვარ ასოცირებული „ქართულ ოცნებასთან“, უნდა მივბრძანდე სამსახურიდან- საპატრულო პოლიციის თავმჯდომარის მოადგილე

საპატრულო პოლიციის დეპარტამენტის უფროსის ყოფილი მოადგილის ვახტანგ დადუნაძის განცხადებით, იგი რამდენიმე დღის წინ სამსახურიდან პოლიტიკური ნიშნით დაითხოვეს.

როგორც დადუნაძემ პრესკონფერენციაზე აღნიშნა, სამსახურიდან დათხოვნაში იგი ბრალს გოგა რაზმაძეს, დავით მიქიაშვილსა და ზურაბ რუხაძეს სდებს.

მისი თქმით, ეს ადამიანები, ყოფილი შს მინისტრის ვანო მერაბიშვილის გუნდის წევრები არიან.

როგორც დადუნაძემ განაცხადა, რუხაძისთვის, მიქიაშვილისა და რაზმაძისთვის, მისი, როგორც „ქართული ოცნების“ მხარდამჭერის სისტემაში მუშაობა მიუღებელია.

„ჩვენს დეპარტამენტში მიმდინარეობს მიზანმიმართული დისკრედიტაცია იმ თანმშრომლების მიმართ, რომლებიც ასოცირდებიან „ქართულ ოცნებსთან“. ამის ნათელი დადასტურებაა ის, რომ მოულოდნელად მიბარებს ამა წლის ხუთ იანვარს დეპარტამენტის პირველი პირი - გოგა რაზმაძე და დამამცირებელი ტონით მეუბნება, რომ მე ვარ ასოცირებული „ქართულ ოცნებასთან“, უნდა მივბრძანდე სამსახურიდან და ახალი სამსახურის საძიებლად ვეახლო ბიძინა ივანიშვილს. ამას მოყვა მისი მხრიდან ჩემი და ჩემი თანამოაზრეების ამსახველი წარსული ფოტოსურათების დაყრა მაგიდაზე“,-აღნიშნა დადუნაძემ.

საპატრულო პოლიციის ყოფილი თანამშრომელი პრემიერ- მინისტრსა და არასამთავრობო ორგანიზაციების წარმოამდეგნლებს სთხოვს, რომ მისი უსაფრთხოება უზრუნველყონ.

ვახტანგ დადუნაძე სამსახურიდან პირველად 2012 წლის ივნისში გათავისუფლდა. მისი თქმით, ამის მიზეზი გახდა „ქართული ოცნებისადმი“ ღია მხარდაჭერა.

მოგვიანებით იგი სამსახურში აღადგინეს.

მონიკა დავალინიძე