საზოგადოება

დავით ოქიტაშვილმა გაერთიანებული პროფკავშირების არჩევნებიდან საკუთარი კანდიდატურა მოხსნა

ხელოვნების მუშაკთა პროფკავშირის თავმჯდომარემ, დავით ოქიტაშვილმა გაერთიანებული პროფკავშირების თავმჯდომარეობის არჩევნებიდან საკუთარი კანდიდატურა მოხსნა.

როგორც ოქიტაშვილმა „ქრონიკას“ აუხსნა, ამით ის ცდილობს დაუმტკიცოს გაერთიანებული პროფკავშირების მოქმედ ხელმძღვანელ ირაკლი პეტრიაშვილს, რომ ის ხელისუფლების მართული კანდიდატი არაა.

„პეტრიაშვილი გაიძახის, რომ მთავრობა ერევა პროფკავშირების საქმიანობაში, რომ მთავრობის ინტერესებშია პროფკავშირების დანგრევა, და ამის მიზეზი ვარ თურმე მე. ერთადერთი მთავარი მიზეზი არის ის, რომ მე პეტრიაშვილს დავუმტკიცე, რომ მე არ ვარ მთავრობის კანდიდატი, და ამიტომ მოვხსენი ჩემი კანდიდატურა. ახლა მაინტერესებს, ვინ დაანგრევს პროფკავშირს“, -განაცხადა ოქიტაშვილმა.

მან არჩევნებს „კლოუნადა“ უწოდა და განაცხადა, რომ კენჭისყრაზე ირაკლი პეტრიაშვილის გამარჯვება უკვე გადაწყვეტილია.

ოქიტაშვილის ინფორმაციით, ის ბრძოლას სასამართლოში გააგრძელებს.

შეგახსენებთ, დღეს დილიდან მიმდინარეობს საქართველოს გაერთიანებული პროფკავშირების თავმჯდომარის არჩევნები. გამარჯვებული ფარული კენჭისყრით გამოვლინდება, რომელიც დღის მეორე ნახევარში გაიმართება.

ოქიტაშვილის კანდიდატურის მოხსნის შემდეგ გაერთიანებული პროფკავშირების ხელმძღვანელობისთვის იბრძოლებენ გაერთიანების მოქმედი თავმჯდომარე ირაკლი პეტრიაშვილი და ენერგეტიკის მუშაკთა პროფკავშირის თავმჯდომარე ამირან ზენაიშვილი.

ანა მებურიშვილი