კომენტარი

დეკანოზის მხრიდან ჩვენების მიცემა დამოკიდებულია მისი ჯანმრთელობის მდგომარეობაზე - ადვოკატი

ჩაფიძის კლინიკაში დეკანოზი გიორგი მამალაძე მოინახულეს მისმა ადვოკატებმა.

როგორც ადვოკატმა, გიორგი ფანცულაიამ ჟურნალისტებს განუცხადა, დეკანოზის მდგომარეობა სტაბილურია და იგეგმება საფუძვლიანი გამოკვლევების ჩატარება.

,,მინდა დავამშვიდო ყველა, რომ არ არის მამა გიორგის მდგომარეობა მძიმე. მე პირადად ვესაუბრე. მისი მდგომარეობა ნორმალურია. ვესაუბრე ექიმს. გადმოყვანის მიზეზი არის ის, რომ 4 დღის განმავლობაში მისი ჯანმრთელობის მდგომარეობა არ იყო კარგი, ამას ვაცხადებდი კიდეც. დღეს გადაწყვიტეს რომ მას ჩატარებოდა საფუძვლიანი გამოკვლევა, ჩაუტარდა იმ დოზით, რომ ამაღამ საფრთხე ხომ არ ემუქრებოდა, ხვალიდან საფუძვლიანად ჩაუტარდება. ექიმების თმით, სჭირდება გამოკვლევები, მაგრამ არ არის კრიტიკული მდგომარეობა. მან დამაბარა, რომ გადავცე ყველას, ოჯახს, რომ არ ინერვიულონ და დარწმუნებულია, რომ მალე გამოჯანმრთელდება. სასჯელაღსრულების დაწესებულებაში გამოჯანმრთელების შემდეგ მოხდება გადაყვანა, როცა ექიმები მიიჩნევენ ამას. იმედია დიდი ხანი არ დასჭირდება აქ ყოფნა, ისე როგორც სასჯელაღსრულების დაწესებულებაში“ - განაცხადა ფანცულაიამ.

მისივე თქმით, დეკანოზის მხრიდან ჩვენების მიცემა, დამოკიდებულია მისი ჯანმრთელობის მდგომარეობაზე.

,,ის ფლობს ინფორმაციას პატრიარქის განცხადებაზე და ბედნიერია, რომ პატრიარქმა ზუსტად ისე შეაფასა, როგორც იყო. რაც შეეხება მის ჩვენებას, ჩვენებას როდის მიცემს დამოკიდებულია იმაზე, როდის გამოჯანმრთელდება მისი მდგომარეობა. რაც შეეხება პროკურატურის დამოკიდებულებას, მოგვეხსენება თუ არა ჩვენ ვალდებულება, ამაზე პასუხი არ არის“ - განაცხადა ადვოკატმა.

ნინო ექვთიმიშვილი