საზოგადოება

დღემდე არ ვიცოდით ემირ კუსტურიცას ცხინვალში ვიზიტის შესახებ - სერბი რეჟისორის კონცერტი გადაიდო

თბილისის სპორტის სასახლეში 8 დეკემბერს დაგეგმილი ემირ კუსტურიცასა და მისი ჯგუფის The No Smoking Orchestra-ის კონცერტი გადაიდო. ამის შესახებ ღონისძიების ორგანიზატორმა ლელა ასლანიკაშვილმა დღევანდელ პრესკონფერენციაზე განაცხადა.

მისი თქმით, „არტ მედია გრუპისთვის“ კონცერტის გამოცხადებამდე არ იყო ცნობილი, რომ სერბი რეჟისორი ოკუპირებულ სამხრეთ ოსეთში 2009 წელს იყო ჩასული, რაც „ოკუპირებული ტერიტორიების შესახებ“ კანონის დარღვევაა. ასლანიკაშვილის განმარტებით, სიტუაციის დაზუსტებამდე კონცერტი არ ჩატარდება.

„სამწუხაროდ, უკანასკნელ დღეებამდე ჩვენთვის ცნობილი არ იყო 2009 წელს მისი ცხინვალში ვიზიტის შესახებ. უდავოა, რომ ჩვენი ქვეყნის კანონმდებლობიდან გამომდინარე საქართველოში მისი ჩამოსვლა გარკვეული იურიდიული საკითხების დაზუსტებას მოითხოვს. შესაბამისად, „არტ მედი გრუპი“ იწყებს ამ საკითხებზე კონსულტაციებს და გაყიდვებიდან ხსნის კონცერტს სიტუაციის გარკვევამდე“, -თქვა ასლანიკაშვილმა.

„არტ მედია გრუპის“ წარმომადგენელმა ასევე ჟურნალისტებს გააცნო სერბი რეჟისორის პირადი პოზიცია მომხდართან დაკავშირებით.

„ის, როგორც მსოფლიოს მოქალაქე, როგორც ადამიანი, რომელიც სერბეთის ომმა ლტოლვილად აქცია, ყველანაირი ომის წინააღმდეგია. სხვადასხვა ქვეყნის კონფლიქტურ ზონებში ჩასვლა მისი ცხოვრების ყოველდღიურობაა. კუსტურიცა ხაზგასმით აცხადებს, რომ მისი არცერთი საჯარო გამოსვლა არ ყოფილა ქართველი ხალხის წინააღმდეგ მიმართული, რომ იგი აკრიტიკებდა საქართველოს იმჟამინდელ ხელისუფლებას და არავითარ შემთხვევაში საქართველოსა და ქართველ ხალხს. რეჟისორის თქმით, ის იცნობს ჩვენს ისტორიასა და კულტურას და მისთვის ძალიან საინტერესოა საქართველოში სტუმრობა, მაგრამ მხოლოდ იმ შემთხვევაში, თუ მისი ვიზიტი ქართული სახელმწიფოსთვის იქნება მისაღები, საქართველოს მოსახლეობისკან კი - მხარდაჭერილი“, -წაიკითხა ასლანიკაშვილმა.

ანა მებურიშვილი