პოლიტიკა

დღეს არის გადამწყვეტი ბრძოლა ზურაბ ადეიშვილის ნარჩენებისგან, რომ მათ სასამართლო ხელისუფლებაში კონტროლი შეინარჩუნონ - ანა დოლიძე

დღეს არის გადამწყვეტი ბრძოლა ზურაბ ადეიშვილის ნარჩენებისგან, რომ მათ სასამართლო ხელისუფლებაში ძალაუფლება და კონტროლი შეინარჩუნონ, - განაცხადა იუსტიციის უმაღლეს საბჭოში პრეზიდენტის მიერ წარდგენილმა არამოსამართლე წევრმა, ანა დოლიძემ, სადაც დღეს იუსტიციის საბჭოს წევრები უვადო მოსამართლეობის მსურველ კანდიდატებს გაესაუბრებიან.

ანა დოლიძე იმედოვნებს, რომ გასაუბრების ეტაპზე უვადო მოსამართლეობის კანდიდატები იგრძნობენ, რომ ისინი მხოლოდ საკუთარი სინდისის წინაშე არიან ვალდებულები.

უვადო მოსამართლეობის თაობაზე განაცხადი იუსტიციის უმაღლეს საბჭოში სულ 51 კანდიდატს აქვს შეტანილი. მათგან 17 კანდიდატი გასაუბრებას დღეს გაივლის.

”გასაუბრების ამ ეტაპის მთლიანი მნიშვნელობა მდგომარეობს იმაში, რომ მოსამართლეებმა იგრძნონ, რომ ისინი არავის წინაშე დავალებულები არ არიან და შესაბამისად, ანგარიშვალდებულნი არიან საკუთარი სინდისის წინაშე. ვფიქრობ, სწორედ ამისთვის გაიმართება ბრძოლა მომავალი 3 წლის განმავლობაში“, - განაცხადა ანა დოლიძემ.