საზოგადოება
დღესდღეობით, საქართველოს ჰყავს 1 477 საერთაშორისო დაცვის ქვეს მყოფი პირი - ირაკლი კობახიძე
საქართველომ მრავალი მნიშვნელოვანი ნაბიჯი გადადგა ლტოლვილთა და თავშესაფრის მაძიებელთა მხარდასაჭერად, - განაცხადა პარლამენტის თავმჯდომარემ ირაკლი კობახიძემ საპარლამენტთაშორისო კავშირის (IPU) რიგით 138-ე ასამბლეაზე სიტყვით გამოსვლისას.
ფორუმზე, რომლის მთავარი თემაა “გლობალური რეჟიმის გაძლიერება მიგრანტთა და ლტოლვილთათვის: მტკიცებულებაზე დაფუძნებული პოლიტიკის გადაწყვეტის საჭიროება“, პარლამენტის თავმჯდომარემ მიგრაციისა და ლტოლვილთა საკითხების მიმართულებით არსებულ გამოწვევებზე ისაუბრა.
“მიუხედავად ასობით ათასი იძულებით გადაადგილებული პირისა და ლტოლვილთა შემაშფოთებელი რაოდენობისა, საქართველო მაინც განაგრძობს ათასობით საერთაშორისო მიგრანტის მიღებას. საქართველომ 2015 წელს - 1 449, 2016 წელს - 947, ხოლო 2017 წელს - 951 თავშესაფრის მაძიებელი მიიღო. დღესდღეობით, საქართველოს ჰყავს 1 477 საერთაშორისო დაცვის ქვეს მყოფი პირი, რომელთაგან 450 ლტოლვილია, ხოლო 1 027 კი ჰუმანიტარული სტატუსის მქონე პირი“, - განაცხადა საქართველოს პარლამენტის თავმჯდომარემ.
ირაკლი კობახიძემ აღნიშნა, რომ საქართველომ მრავალი მნიშვნელოვანი ნაბიჯი გადადგა ლტოლვილთა და თავშესაფრის მაძიებელთა მხარდასაჭერად და საქართველოს მიერ ინსტიტუციონალური, ნორმატიული და პრაქტიკული ინსტრუქციების განხორციელება ევროკავშირის მიერ დადებითად შეფასდა.