პოლიტიკა

ეკა ბესელიას ინიციატივამ საპარლამენტო ოპოზიციის უკმაყოფილება გამოიწვია

საპარლამენტო ოპოზიციამ ე.წ. ფარული მოსმენების შესახებ კანონპროექტის მეორე მოსმენით განხილვისას გააპროტესტა კანონპროექტის ერთ-ერთი ავტორის, ეკა ბესელიას მიმართვა. მან სთხოვა პარლამენტის თავმჯდომარეს, ირაკლი კობახიძეს, რომ პაკეტში შემავალი ერთ-ერთი კანონპროექტი „საჯარო სამართლის იურიდიული პირის – საქართველოს ოპერატიულ-ტექნიკური სააგენტოს შესახებ“ არა მუხლობრივად, არამედ თავების მიხედვით ყოფილიყო განხილული.

ირაკლი კობახიძემ ეკა ბესელიას შეთავაზება გაითვალისწინა, რასაც უკმაყოფილება მოჰყვა ოპოზიციონერი პარლამენტარების მხრიდან.

საპარლამენტო ფრაქცია ერთიანი ნაციონალური მოძრაობის წევრის, ზურაბ ჭიაბერაშვილის განცხადებით, უმრავლესობა ცდილობს, რაც შეიძლება მალე დაამთავროს მუშაობა ამ კანონზე.

„თქვენი ამოცანაა, დროზე მოიცილოთ ეს კანონპროექტი და გადახვიდეთ სხვა საკითხებზე. ეს კანონპროექტი არის ფუნდამენტური, მნიშვნელოვანი კანონპროექტი. თუ ჩვენ დავსხდებით და შევთანხმდებით გარკვეულ საკითხებზე, მაშინ შესაძლებელია, აზრი ჰქონდეს დისკუსიას, წინააღმდეგ შემთხვევაში, დავამთავროთ და კენჭი უყარეთ“, - განაცხადა ჭიაბერაშვილმა.

ირაკლი კობახიძემ განმარტა, რომ ეკა ბესელიას ინიციატივა შემჭიდროებული ვადების გამო მიიღო.

„რეალურად, ის არჩევანი, რაც თქვენ გააკეთეთ, ხელს უშლიდა ამ კანონპროექტების სიღრმისეულად განხილვას. თქვენ ხელოვნურად წელავდით დროს დღეების განმავლობაში. თქვენ საგნობრივი განხილვა ჩაშალეთ. ქალბატონი ეკას ინიციატივა აბსოლუტურად მისაღებია“, – მიმართა კობახიძემ ოპოზიციონერ დეპუტატებს.

ფრაქცია „ევროპულმა საქართველომ“ პროტესტის ნიშნად სხდომა დატოვა.

შეგახსენებთ, რომ პარლამენტში მეორე მოსმენით განიხილავენ საკონსტიტუციო ცვლილებათა პაკეტს ე.წ. ფარული მოსმენების შესახებ.

ანა მებურიშვილი