საზოგადოება

ესაა ადმინისტრაციულიც და სისხლის სამართლის დანაშაულიც და მასზე რეაგირებაც შესაბამისი იქნება - თათია დოლიძე ე.წ. „ქართველთა მარშის“ ორგანიზატორების მუქარაზე

გაეროში საქართველოს ყოფილი ახალგაზრდა დელეგატი თათია დოლიძე ე.წ. „ქართველთა მარშის“ ორგანიზატორების მხრიდან კიბერმუქარას გამოეხმაურა. მისი თქმით, ამ ფაქტზე ის აუცილებლად მოახდენს რეაგირებას.

მან ასევე მოუწოდა ჟურნალისტებს, არ შეაწუხონ, რათა საშუალება მისცენ, საქმე „სამართლებრივად დალაგდეს“.

„მინდა, გთხოვოთ, რომ შეწყდეს ჩემთან გაუთავებელი ზარები ჟურნალისტების მხრიდან, რადგან ეს მხდის უმოქმედოს. მობილურითაც ვერ ვსარგებლობ, რამდენადაც 1 წამითაც არ ჩერდება. თუ ეს საკითხი მართლა გაწუხებთ, გთხოვთ, მომეცით საშუალება სამართლებრივად დალაგდეს ყველაფერი. პოლიტიკური ელფერის მიცემა არ არის საჭირო. სხვადასხვა პარტიებსაც ვთხოვ, ჩემს ქეისს ნუ გამოიყენებენ პოლიტიკური მიზნებისთვის. ეს არის ადმინისტრაციულიც და სისხლის სამართლის დანაშაულიც. მასზე რეაგირებაც შესაბამისი იქნება. მადლობა საზოგადოებას ერთსულოვნებისთვის“, დაწერა დოლიძემ ფეისბუკის საკუთარ გვერდზე.

შეგახსენებთ, გუშინ ე.წ. „ქართველთა მარშის“ ორგანიზატორებმა ბექა ვარდოსანიძის პოსტის ქვეშ თათია დოლიძეს ჯგუფური გაუპატიურებით დაემუქრნენ. მიუხედავად იმისა, რომ პოსტი წაიშალა, კომენტარების სქრინი ფეისბუკის მომხმარებლებმა შეინახეს.