პოლიტიკა

ეუთოს მოქმედი თავმჯდომარე ელინა ვალტონენი სამხრეთ კავკასიას ეწვევა

ეუთოს მოქმედი თავმჯდომარე, ფინეთის საგარეო საქმეთა მინისტრი ელინა ვალტონენი, 13-15 ოქტომბერს ეწვევა აზერბაიჯანს, სომხეთსა და საქართველოს, სადაც მაღალი თანამდებობის ოფიციალურ პირებთან, ასევე სამოქალაქო საზოგადოების წარმომადგენლებთან და ანალიტიკურ ცენტრთან შეხვედრებს გამართავს.

ამის შესახებ ინფორმაციას „ევროპის უსაფრთხოებისა და თანამშრომლობის ორგანიზაცია“ ავრცელებს.

ვიზიტის დღის წესრიგში სხვა საკითხებთან ერთად შედის სომხეთსა და აზერბაიჯანს შორის სამშვიდობო პროცესის მიმდინარეობა, განსაკუთრებული ყურადღება კი ეუთო-ს მინსკის პროცესის დასრულებასა და მასთან დაკავშირებულ სტრუქტურებს დაეთმობა.

საქართველოში შეხვედრები შეეხება ქვეყნის შიდა და გარე გამოწვევებს, მათ შორის ეუთოს მუდმივ მხარდაჭერას ჟენევის საერთაშორისო დისკუსიების მიმართ, რომლებიც 2008 წლის ომის შედეგების მოგვარებას ემსახურება.

ფინეთი, როგორც ეუთოს 2025 წლის თავმჯდომარე ქვეყანა, განსაკუთრებულ მნიშვნელობას ანიჭებს სამოქალაქო სივრცის დაცვას და ისეთი გარემოს შექმნას, რომელიც ხელს უწყობს სამოქალაქო საზოგადოების საქმიანობას. ეს პრიორიტეტი ვიზიტის განმავლობაში განსაკუთრებით ხაზგასმული იქნება.