პოლიტიკა
რომან გოცირიძე სახელფასო კანონპროექტზე: როგორც იღებდნენ ორმოცჯერ პრემიებს, ასევე გააგრძელებენ ამ საქმიანობას მომავალში
საქართველოს პარლამენტის წევრი ნაციონალური მოძრაობიდან, რომან გოცირიძე შრომითი ანაზღაურების შესახებ კანონპროექტთან დაკავშირებით ფეისბუქის პირად გვერდზე სტატუსს აქვეყნებს.
,,პარლამენტში პინოჩეტის კანონის განხილვა დაიწყო. პინოჩეტის იმიტომ, რომ ძალიან წყალობდა შეიარაღებულ სტრუქტურებს. ჩვენთან ის განსხვავებაა, რომ მხოლოდ უფროსობა სარგებლობს პრივილეგიებით.
ხელფასების, პრემიების, დანამატების შესახებ კანონი ძალოვან სტრუქტურებს არ შეეხება. არ ეხება ასევე უამრავ სხვა უწყებას. ნახ-ნახევარა კანონია:). როგორც იღებდნენ ორმოცჯერ პრემიებს, ასევე გააგრძელებენ ამ საქმიანობას მომავალში. 65 ათასი საჯარო მოხელე არ დაექვემდებარება ახალი კანონის მოქმედების სფეროს.
თუ დღემდე სახელფასო განუკითხაობა კანონის არარსებობით აიხსნებოდა, ახლა კანონის ძალით გაეხსნებათ ხელ-ფეხი“, - წერს გოცირიძე,
ცნობისათვის, პარლამენტის თავმჯდომარის, ირაკლი კობახიძის ინფორმაციით, საკანონმდებლო ორგანოში შესულია შრომითი ანაზღაურების შესახებ კანონპროექტი, რომლის შედეგადაც შრომის ანაზღაურების ფიქსირებულ სისტემაზე გადასვლა მოხდება და მაქსიმალურად შეიზღუდება პრემიების განაწილების წესი.
ნინო ექვთიმიშვილი