სამართალი
ფარმან ჯეირანლის დაპატიმრება პოლიტიკური მოტივებით იყო განპირობებული - გელა ნიკოლაიშვილი
კლინიკა „ლანცეტის“ გენერალური დირექტორის ფარმან ჯეირანლის დაკავებასთან დაკავშირებით, მისი ადვოკატი გელა ნიკოლაიშვილი, პრესკონფერენციას მართავს.
ადვოკატი ეჭვობს, რომ ჯეირანლის მიმართ ინკრიმინირებულ დანაშაულს არანაირი საფუძველი არ გააჩნია და დაპატიმრება პოლიტიკური მოტივებით იყო განპირობებული.
„გამომდინარე იქიდან, რომ სამართლებრივად, კრიმინოგენური თვალსაზრისით, მის მიმართ ინკრიმინირებულ დანაშაულს არანაირი საფუძველი არ გააჩნია, ყველაფერი მიანიშნებს იმაზე, რომ ეს იყო პოლიტიკური მოტივებით განპირობებული დაპატიმრება. აზერბაიჯანელი ჟურნალისტის გადაცემის თუ გატაცების, თუ აორთქლების ფაქტიდან გამომდინარე, უკვე ეჭვს არ იწვევს, რომ აზერბაიჯანის ხელისუფლება მოითხოვს საქართველოს ხელისუფლებისგან მის მიმართ ოპოზიციურად განწყობილი პირების მიმართ რეპრესიების გატარებას“,-განაცხადა ნიკოლეიშვილმა.
კლინიკა“ლანცეტის“ დირექტორს ფარმან ჯეირანლის 6-დან 9 წლამდე პატიმრობა ემუქრება.
საუბარია 2016 წელს მომხდარ შემთხვევაზე, როდესაც კლინიკა „ლანცეტში“ ღვიძლის გადანერგვის ოპერაციის შემდეგ, ორი პაციენტი გარდაიცვალა.
გარდაცვლილების ოჯახის წევრებმა გამოძიების მოთხოვნით პროკურატურას მიმართეს. ისინი კლინიკის ხელმძღვანელობას თაღლითური სქემის განხორციელებაში ადანაშულებენ.
მათი მტკიცებით, ოპერაცია ჩაატარა არალიცენზირებულმა ექიმებმა, შესაბამისად მათ ჩაიდინეს თაღლითობა, რადგან პაციენტების ოჯახის წვერებს 40-40 ათასი დოლარის გადახდა მოუწიათ.
მონიკა დავლიანიძე