საზოგადოება
ფაროსანა არაა მწერი, რომელიც შეიძლება ერთ-ორ წელიწადში დამარცხდეს - გიორგი ხანიშვილი
სოფლის მეურნეობის მინისტრის მოადგილის, გიორგი ხანიშვილის განცხადებით, აზიურ ფაროსანასთან ბრძოლის სხვადასხვა მეთოდია განსაზღვრული, მათ შორისაა ბუნებრივი მტრის შემოყვანა. მისი თქმით, უწყება ყველაფერს გააკეთებს მავნებლის პოპულაციის შესამცირებლად.
„ნებისმიერი ბუნებრივი მტერი შეიძლება განვიხილოთ, თუმცა მათი შემოყვანა მეცნიერების მრავალწლიანი შრომისა და მუშაობის შედეგად შეიძლება მოხდეს. ჩვენ ყველაფერს ვაკეთებთ, რომ მომავალ წელს მაქსიმალურად შევძლოთ აზიური ფაროსანას პოპულაციის კონტროლქვეშ მოქცევა. ფაროსანა არ არის მწერი, რომელიც შეიძლება ერთ და ორ წელიწადში დამარცხდეს, მაგრამ მაქსიმუმს ვაკეთებთ, რომ ეს ზიანი ნაკლები იყოს“,- უთხრა ხანიშვილმა ჟურნალისტებს.
მან ასევე ურჩია მოსახლეობას, დაიწყოს პრევენციული სამუშაოები.
„ამჟამად საჭიროა, თხილის ბაღებში მოსახლეობამ დაიწყოს გამოსუფთავებისა და გასხვლის სამუშაოები, ასევე დამუშავდეს ქიმიურად. ეს სამუშაოები აზიურ ფაროსანასთან პირდაპირ კავშირში არაა, თუმცა კავშირშია მაღალმოსავლიანობასთან“,- აღნიშნა მინისტრის მოადგილემ.
ანა მებურიშვილი