საზოგადოება
ფოტოგრაფ გია აბდალაძის თქმით, მისი დასჯის შემკვეთები ვანო მერაბიშვილი, მიხეილ სააკაშვილი, ზურაბ ადეიშვილი, გიგა ბოკერია და შოთა უტიაშვილი არიან
ფოტოგრაფ გია აბდალაძის განცხადებით, გლდანის ციხეში ყოფნის დროს შსს-ის კონტრდაზვერვის დეპარტამენტის უფროსის ყოფილი მოადგილე დავით დევნოზაშვილი ემუქრებოდა, რომ მისი შვილის სიცოცხლეს საფრთხე დაემუქრებოდა, თუკი დანაშაულს არ აღიარებდა. ამის შესახებ აბდალაძემ ე.წ. „ფოტოგრაფების საქმის“ სასამართლო პროცესზე თქვა. ის მოწმის სტატუსით დაიკითხა.
ფოტოგრაფმა აღნიშნა, რომ დევნოზაშვილთან ერთად მასზე ზეწოლას ახდენდა ციხის ადმინისტრაციის კიდევ ერთი თანამშრომელი, რომელიც ამჟამად „დინამოს“ ბაზის დაცვის სამსახურში მუშაობს.
აბდალაძემ ასევე ყურადღება გაამახვილა ეკა ბესელიას აცილების ფაქტზე, რომელიც იმ დროს მისი ადვოკატი იყო. ფოტოგრაფმა აღნიშნა, რომ ბესელია არ დაეთანხმა მის ცრუ ჩვენებას, რაც გამოძიებისთვის მნიშვნელოვანი დეტალია.
აბდალაძის ვარაუდით, ის 26 მაისს გადაღებული ფოტოებისთვის დაისაჯა, მისი დაკავების შემკვეთებად კი ვანო მერაბიშვილი, მიხეილ სააკაშვილი, ზურაბ ადეიშვილი, გიგა ბოკერია და შოთა უტიაშვილი დაასახელა.
გია აბდალაძე კიდევ სამ ფოტოგრაფთან - ნათია და ირაკლი გედენიძეებთან, ასევე ზურაბ ქურციკიძესთან ერთად 2011 წელს ჯაშუშობის ბრალდებით დააკავეს, თუმცა შემდგომ ისინი საპროცესო შეთანხმების საფუძველზე გაათავისუფლეს. რაც შეეხება შსს-ის კონტრდაზვერვის დეპარტამენტის უფროსის ყოფილ მოადგილეს დავით დევნოზაშვილს, ე.წ. „ფოტოგრაფების საქმეზე“ საქართველოს მთავარმა პროკურატურამ ის 2016 წელს დააკავა. აღნიშნულ საქმეზე გედენიძეები და ქურციკიძე მოწმეების სახით უკვე დაიკითხნენ.
ანა მებურიშვილი