საზოგადოება
გამომცემლების ნაწილი განათლების სამინისტროს აკრიტიკებენ
გამომცემლების ნაწილი განათლების სამინისტროს გადაწყვეტილებას აპროტესტებენ, რომელიც სასკოლო სახელმძღვანელოების გრიფირების საკითხზე გასამართ ტენდერს ეხება.
გამომცემლობა „არტანუჯის“ ხელმძღვანელის, ბუბა კუდავას განცხადებით, სახელმწიფო აქცენტს გააკეთებს უფრო იაფიანი და უხარისხო სახელმძღვანელოების შეძენაზე.
„ერთმა გამომცემლობამ თუ შექმნა მაღალი დონის სახელმძღვანელო, რომელსაც ირჩევს სკოლების 90% და მეორემ შექმნა სახელმძღვანელო, რომელსაც ირჩევს სკოლების 10%, თუკი ეს უკანასკნელი იქნება უფრო იაფი, სახელმწიფო შეისყიდის ნაკლებად ხარისხიან სახელმძღვანელოს, რომელიც პრაქტიკაში ცუდად იმუშავებს. სახელმძღვანელოს შექმნისა და განკარგვის, ანუ ბეჭდვის უფლება არის განუყოფელი. თუკი გამომცემლობა გადაწყვეტს, რომ მისი წიგნი უნდა დაბეჭდოს სხვამ, ეს მისი გადასაწყვეტია, შეიძლება ეს უფლება სხვას გადასცეს“, - განაცხადა ბუბა კუდავამ დღევანდელ პრესკონფერენციაზე.
გამომცემელთა და გამავრცელებელთა ასოციაციის თავმჯდომარის, გვანცა ჯობავას განცხადებით, ისინი სასკოლო სახელმძღვანელოებთან დაკავშირბულ ტენდერში არ მიიღებენ მონაწილეობას, თუმცა შეეცდებიან, სამინისტროს პოზიცია შეცვალონ.
დღევანდელ ბრიფინგზე განათლების მინისტრის მოადგილემ თეიმურაზ მურღულიამ განაცხადა, რომ სასკოლო სახელმძღვანელოების გრიფირების საკითხზე ტენდერი 31 მარტს გამოცხადდება. მან აღნიშნა, რომ უწყება არ აპირებს გამომცებლების მოთხოვნათა ნაწილის გათვალისწინებას, ხოლო წიგნების გრიფირების წესთან დაკავშირებით მიღებულ გადაწყვეტილებას არ ცვლის. მისი განმარტებით, აზრთა სხვადასხვაობა ორ საკითხს მოჰყვა, ტენდერის გამოცხადებასა და წიგნების რეალიზაციას.
ანა მებურიშვილი