კომენტარი

გარდაუვალია შტატების შემცირება - მიხეილ გიორგაძე

კულტურის მინისტრმა მიხეილ გიორგაძემ განაცხადა, რომ უწყებაში გაუქმებული სპორტისა და ახალგაზრდობის საქმეთა სამინისტროს სპორტის ნაწილის დამატებას მოჰყვება საშტატო შემცირებები.

მისი თქმით, სამინისტროების საბოლოო შერწყმამდე, ახლად ჩამოყალიბებული უწყების თანამშრომლები 2 შენობაში იმუშავებენ.

„ადამიანების რაოდენობის მხრივ ციფრებზე სასაუბროდ, მზად არ ვარ, ბუნებრივია, რადგან ოპტიმალური როგორც სტრუქტურა, ისე საშტატო განრიგი უნდა ჩამოვაყალიბოთ.

შენობებს რაც ეხება, პირველ ხანებში, მოგვიწევს ორ შენობაში გადანაწილება, თუმცა ოპტიმალური და იდეალური იქნებოდა, ერთ შენობაში განთავსება ელემენტარული საკომუნიკაციო, სამუშაო ატმოსფეროს შესაქმნელად.

ბიუჯეტი, რომელიც ადმინისტრაციულ ხარჯებზე იყო გამოყოფილი, ერთმნიშვნელოვნად შემცირდება. გარდაუვალია შტატების შემცირება და შემცირება დიდწილად ადმინისტარციულ ნაწილზე მოვა“, - თქვა გიორგაძემ.

ანა მებურიშვილი