პოლიტიკა

გასაგებია, რომ ბოლომდე დაიცავდნენ ქიბარ ხალვაშის ინტერესებს - „რუსთავი 2“-ის იურისტი მთავრობის მოთხოვნაზე

„რუსთავი 2“-ის იურისტის, თამთა მურადაშვილის განმარტებით, საქართველოს მთავრობის მოთხოვნა, არხი გადაეცეს ქიბარ ხალვაშს, ურთიერთგამომრიცხავია და ემსახურება ქიბარ ხალვაშის ინტერესებს.

„ერთადერთი, რასაც მთავრობა აღიარებს არის ის, რომ „რუსთავი 2“ ნამდვილად პოპულარული არხია. ამბობს, რომ „რუსთავი 2-ის“ დამოუკიდებლობას არ ემუქრება საფრთხე, რომ „რუსთავი 2“ ხშირად არის კრიტიკული მთავრობის მიმართ, მაგრამ ამბობს, რომ თუ ვინმე თავდასხმას ახორციელებს, ეს თავად „რუსთავი 2“-ია, რომელიც მოსამართლეებს თავს ესხმის და ის არის ცრუ ინფორმაციის გამავრცელებელი არხი. ზოგადად ჩვენი საქმიანობა შეფასებულია უარყოფითად.

არხი რომ თავად ახორციელებს ჟურნალისტებზე ზეწოლას, ამის მაგალითად მოჰყავთ უკანასკნელი პერიოდის მაგალითები, მაგალითად 2018 წლის იანვრის მაგალითი, „ევროპული საქართველოს“ განცხადებები, სადაც ისინი გვადანაშაულებენ ცრუ ინფორმაციის განზრახ გავრცელებაში და ასევე აკაკი გოგიჩაიშვილის Facebook პოსტების ე.წ. სქრინშოტები, სადაც ის საუბრობდა ნიკა გვარამიას მხრიდან თითქოს ზეწოლაზე, რომ ის არ იყო დამოუკიდებელი და ამის გამო წავიდა სხვა ტელევიზიაში.

ალბათ ლოგიკურია, რომ მხარემ მოითხოვოს დროებითი ღონისძიების გაუქმება. გასაგებია, რომ მძიმე ტვირთად აწევს მთავრობას და ამიტომ, თუმცა მთავრობა უნდა დაფიქრდეს, რომ თუ ეს ორ კერძო პირს შორის დავაა, როგორც ის ასევე აღნიშნავს თავის არგუმენტაციაში, რატომ აქვს ასეთი ინტერესი იუსტიციის სამინისტროს, რომ ამ დავას დროებითი ღონისძიება მოეხსნას და დაუყოვნებლივ გადაეცეს კერძო პირს, ქიბარ ხალვაშს. ანუ, თუ ეს ლახავს იმიჯს, ეს დროებითი ღონისძიება, მთავრობა მოტივირებული უნდა იყოს, რომ ეს გამოსწორდეს და არა ის, რომ ორ კერძო პირის დავაში იმ კერძო პირს მიაკუთვნოს კომპანია, ვისზეც ამხელა აჟიოტაჟი ატყდა, ფაქტობრივად ყველამ აღიარა, რომ ეს იყო პოლიტიკურად მოტივირებული დავა. აქედან გამომდინარე ეს არის ჩემთვის ურთიერთგამომრიცხავი, მოულოდნელი არ ყოფილა ამ კუთხით, გასაგებია, რომ ბოლომდე დაიცავდნენ ქიბარ ხალვაშის ინტერესებს ,“- განაცხადა მურადაშვილმა.

„რუსთავი 2“-ის გენერალურმა დირექტორმა ნიკა გვარამიამ საკუთარ ფეისბუკზე გაავრცელა სტრასბურგის სასამართლოს პასუხი, რომლის მიხედვით საქართველოს მთავრობა საქმის განხილვის დასრულებამდე მოითხოვს, დაუყოვნებლივ მოიხსნას დროებითი ღონისძიება და არხი გადაეცეს ქიბარ ხალვაშს. გვარამიას თქმით, ტელევიზიის მხრიდან მიკერძოებისა და სიცრუის გავრცელების დასადასტურებლად იუსტიციის სამინისტროს ევროპული საქართველოსა და აკაკი გოგიჩაიშვილის განცხადებები მოჰყავს.