პოლიტიკა

გავრცელებულ ვიდეოებთან დაკავშირებით, გამოძიებას მოკვლევა საზოგადოებისთვის არ მიუწოდებია - ანი მიროტაძე

პარტია `ეროვნული ფორუმის~ წევრის, დეპუტატ ანი მიროტაძის განცხადებით, ფარულ მიყურადებასთან დაკავშირებით სასჯელის გამკაცრების პროცესი დაწყებულია.

მიროტაძის თქმით, მისი ინიციატივა ფარულ მიყურადებასთან დაკავშირებით, უკვე დარეგისტრირდა ადამიანის უფლებათა დაცვის კომიტეტში.

რამდენად სიცოცხლისუნარიანი იქნება კანონი, მიროტაძე თვლის, რომ ეს დამოკიდებულია მასზე, რამდენად სწორად გამოიყენებენ ამ კანონს შესაბამისი სტრუქტურები.

"იმედი მაქვს, რომ მსგავსი ფაქტების გავრცელება აღარასდროს მოხდება. ასევე იმედს ვიტოვებ, რომ რაც შეიძლება სწრაფად გაიხსნება ეს ფაქტები. თუმცა ძალიან აგვიანებს. გამახსენდა ის წამზომი, რომელიც სახალხო დამცველმა ჩაურთო პროკურატურას. ვფიქრობ, ეს თემა უკვე აქტუალურია, რადგან გავრცელებულ ვიდეოებთან დაკავშირებით, გამოძიებას არანაირი მოკვლევა არ მიუწოდებია საზოგადოებისთვის. ეს ექვემდებარება იმას, რომ დაისვას კითხვები, რატომ ჭიანურდება ამ ხნის განმავლობაში გამოძიება", - განაცხადა მიროტაძემ.

მონიკა დავლიანიძე