უახლესი ამბები
არქივი
კომენტარი
გაზის ტარიფი მთელ საქართველოში საშუალოდ 11-12 თეთრით გაიზარდა - ზურაბ ჭიაბერაშვილი
„ევროპული საქართველოს“ წევრი ზურაბ ჭიაბერაშვილი დენის ტარიფის მატებას პროგნოზირებს.
როგორც დეპუტატმა პარლამენტის პლენარულ სხდომაზე განაცხადა, გაზის ტარიფი მთელ საქართველოში საშუალოდ 11-12 თეთრით გაიზარდა და მოსალოდნელია დენის ტარიფის გაძვირებაც.
„საზაფხულო არდადეგების პირობებში მოხდა მნიშვნელოვანი ფაქტი ჩვენი მოქალაქეებისათვის, რომელიც შეიძლება პარლამენტარს ან ბიუროკრატს ნაკლებად აღელვებდეს - ეს იყო გაზის ტარიფის ზრდა.
რატომღაც ჩაითვალა, რომ რადგან თბილისში მხოლოდ ნახევარი თეთრით გაიზარდა, ასე მოხდა დანარჩენ საქართველოშიც. სინამდვილეში გაზის ტარიფი ძალიან მნიშვნელოვნად გაიზარდა მთელ საქართველოში - საშუალოდ 11-12 თეთრით. მე კონკრეტული რაიონების მაგალითებსაც გეტყვით: საგარეჯოში - 17 თეთრით, გურჯაანში - 13 თეთრით, დუშეთში - 16 თეთრით, ყაზბეგში - 17 თეთრით, გორში - 11 თეთრით, ზესტაფონში - 14 თეთრით, გურიის სამივე რაიონში - 12 თეთრით, აჭარაში - 12 თეთრით... მთელი ქვეყნის მასშტაბით ძალიან ბევრ მოქალაქეს გაუძვირდა გაზის ტარიფი, რასაც შეიძლება ზაფხულის პერიოდში ბევრი ვერც გრძნობდეს, მაგრამ ზამთარში ძალიან მძიმედ დააწვება არაერთ ოჯახს. ამას ვახსენებ „ქართულ ოცნებას“, რომლისთვისაც ერთ-ერთი მთავარი ლოზუნგი და წინასაარჩევნო დაპირება ტარიფების შემცირება იყო“, - განაცხადა ჭიაბერაშვილმა.
მისივე თქმით, წლის ბოლომდე მოსალოდნელია დენის ტარიფის, ასევე პროდუქტებსა და მედიკამენტებზე ფასების ზრდა.
ნინო ექვთიმიშვილი