მსოფლიო

გერმანიის ნაკრების კარში გატანილი გოლით გახარებულმა მექსიკელმა გულშემატკივრებმა ხელოვნური მიწისძვრა გამოიწვიეს

მექსიკის გეოლოგიური და ატმოსფერული კვლევების ინსტიტუტმა 2018 წლის მსოფლიო ჩემპიონატზე მექსიკისა და გერმანიის საფეხბურთო ნაკრებების შეხვედრის დროს მეხიკოში ხელოვნური მიწისძვრა დააფიქსირა.

ორგანიზაციის მონაცემებით, შეხვედრის 35-ე წუთზე გერმანიის ნაკრების კარში გოლის გატანიდან 7 წამში მეხიკოს სულ მცირე ორ ადგილას მიწისქვეშა ბიძგები დაფიქსირდა. სავარაუდოდ, ბიძგები გახარებული გულშემატკივრების ხტუნვამ გამოიწვია.

გუშინ რუსეთში გასამართ მუნდიალზე მექსიკის ნაკრებმა მოქმედი მსოფლიო ჩემპიონი გერმანია მინიმალური სხვაობით, 1:0 დაამარცხა. ერთადერთი გოლი მექსიკელმა ნახევარმცველმა, ირვინგ ლოსანომ გაიტანა, რომელიც მატჩის საუკეთესო მოთამაშედ დასახელდა.