საზოგადოება

,,ღია საზოგადოების მხარდამჭერი“ – „მედიანიუსი“ ნომინაციაში გამარჯვებულად დასახელდა

„ახალგაზრდა ადვოკატებმა“ საქართველოს პარლამენტის ეროვნულ ბიბლიოთეკაში, 2017 წლის საქმიანობის შემაჯამებელი ღონისძიება გამართეს.

ორგანიზაციამ სასამართლო ინსტანციის, საჯარო და კერძო სფეროს წარმომადგენლები და ჟურნალისტური კორპუსი სპეციალურ ნომინაციებში დააჯილდოვა. ნომინაციებში გამარჯვებულთა შორის მოხვდა ახალი ამბების სააგენტო „მედიანიუსი“.

,,ახალგაზრდა ადვოკატების“ აღმასრულებელი გუნდის გადაწყვეტილებით, 2017 წლის ნომინაციაში ,,ღია საზოგადოების მხარდამჭერი“,- ჯილდო გადაეცა ახალი ამბების სააგენტო „მედიანიუსს“.

როგორც ,,ახალგაზრდა ადვოკატების“ ხელმძღვანელმა, არჩილ კაიკაციშვილმა აღნიშნა, ორგანიზაციამ 2014 წლიდან საფუძველი ჩაუყარა ტრადიციას, როდესაც საქმიანობის წლის შემაჯამებელ ღონისძიებაზე აღინიშნება პროფესიული წრისა და იმ ინსტიტუციების დამსახურებული როლი, რომლებმაც ორგანიზაციასთან თანამშრომლობის პროცესში ან საზოგადოებრივი მაღალი ნდობის პირობებში საკუთარი უფლებამოსილებები და ვალდებულებები კეთილსინდისიერად შეასრულეს.

ორგანიზაციამ ,,ახალგაზრდა ადვოკატები“ გუშინვე გამართა 2017 წლის საქმიანობის შესახებ მომზადებული ჟურნალის პრეზენტაცია, საზოგადოებას წარუდგინა საქმიანობის შესახებ მომზადებული ვიდეო-რგოლი და ახალი ინიციატივები და წინადადებები, რომელიც „ახალგაზრდა ადვოკატების“ 2018 წლის საქმიანობას და პრიორიტეტებს განსაზღვრავს.

შეხვედრას აღმასრულებელი, საკანონმდებლო და სასამართლო ხელისუფლების წარმომადგენლები, სამოქალაქო ორგანიზაციები, ჟურნალისტური კორპუსი, ორგანიზაციის პარტნიორები და მეგობრები ესწრებოდნენ.