საზოგადოება

გიორგი გახარიას არაფერი დაუძრავს, რა სისულელეა - ზაზა სარალიძე შსს-ის მინისტრისა და თეა წულუკიანის გადადგომას მოითხოვს

ხორავას ქუჩაზე მოკლული დავით სარალიძის მამის, ზაზა სარალიძის განცხადებით, შსს-ს საქმე არ დაუძრავს, ხოლო მერაბ მორჩაძის დაკავებით უწყება ცდილობს, აღარ ჰქონდეს საქმის ერთ-ერთი მოწმის, მ.კ.-ს დაკავების საფუძველი, თითქოს მან ცრუ ჩვენება ზეწოლის ქვეშ მისცა.

„გიორგი გახარიას არაფერი დაუძრავს, რა სისულელეა. ეს გადადგმული ნაბიჯები იყო სისულელე . მორჩაძე რომ დააკავეს ვიღაც, ამით ცდილობენ, მოწმის ჩვენება „გააპრავონ“, თითქოს მან ზეწოლის ქვეშ მისცა ცრუ ჩვენებები სასამართლოს, რომ მისი დაკავების საფუძველი აღარ ჰქონდეთ“, – უთხრა სარალიძემ რუსთაველის გამზირზე შეკრებილ ჟურნალისტებს.

მან განაცხადა, რომ მინისტრი გიორგი გახარია სახლში უნდა წავიდეს, ხოლო მის მაგივრად უნდა დანიშნონ კომპეტენტური პირი, ვინც საქმეს ბოლომდე გამოიძიებს.

„მოთხოვნები აბსოლუტურად იგივე რჩება. მკვლელები, ხელის დამფარებლები უნდა დაისაჯონ. გახარია აუცილებლად უნდა წავიდეს სახლში და მოვიდეს კომპეტენტური მინისტრი, ვინც ბოლომდე მიიყვანს ამ საქმეს", - განაცხადა სარალიძემ

მან ასევე მოითხოვა იუსტიციის მინისტრის, თეა წულუკიანის გადადგომა.

„ვითხოვ, ასევე წულუკიანის გადადგომას იქიდან გამომდინარე, რომ შოთაძე გაუშვა ტაშ-ფანდურით, ტაში დაუკრა. გუშინ კომენტარიც წავიკითხე, არ უნდა გადამდგარიყოო. თუ არ უნდა გადამდგარიყო, არ გადამდგარიყო, რა პრობლემაა და თუ გადადგა, პასუხისგებაში რატომ არაა მიცემული იმ დანაშაულისთვის, რა დანაშაულიც ჩაიდინა“, – დასძინა სარალიძემ.

სარალიძემ აღნიშნა, რომ არ სჯერა, თითქოს ყოფილმა მთავარმა პროკურორმა ირაკლი შოთაძემ არ იცოდა, „საქმე როგორ იკერებოდა“.

მერაბ მორჩაძე ხორავას ქუჩაზე მომხდარი მკვლელობის საქმის მოწმეზე ზემოქმედების ბრალდებით დააკავეს სსკ-ის 372-ე მუხლის მეორე ნაწილით. მორჩაძე საქმის ერთ-ერთი მოწმის, მ.კ.-ის ახლობელია.