პოლიტიკა
,,გირჩმა’’ თბილისის ზოოპარკის დირექტორს მიმართა წერილით, დედალი სირაქლემა ეთხოვებინა
„გირჩის“ ერთ-ერთი ლიდერი და პრეზიდენტობის კანდიდატი, ზურაბ ჯაფარიძე საქალაქო სასამართლოში 13 ივლისს დედალი სირაქლემით მისვლას გეგმავს.
დღეს ,,გირჩმა’’ თბილისის ზოოპარკის დირექტორს, ბატონ ზურაბ გურიელიძეს მიმართა წერილით, რომ ზურაბ ჯაფარიძეს 13 ივლისის სასამართლო პროცესზე დასწრების მიზნით, დედალი სირაქლემა ეთხოვებინა.
გირჩის აზრით, ქვეყანაში არსებული უსამართლობის მიმართ საერთო სასამართლოების დამოკიდებულებას ზუსტად ასახავს ქვიშაში თავჩარგული სირაქლემას პოზიცია.
„გირჩი“ მიიჩნევს, რომ საქართველოში არ არსებობს სასამართლო, საერთო სასამართლოების სისტემა მთლიანად გადაქცეულია ქვიშაში თავჩარგულ სირაქლემად. გთხოვთ, 13 ივლისს ნახევარი დღით გვათხოვოთ ერთი დედალი სირაქლემა, რომლის ტრანსპორტირებასაც ვუზრუნველყოფთ ჩვენ“, – წერია წერილში, რომელსაც „გირჩის“ თავმჯდომარე იაგო ხვიჩია აწერს ხელს.
ამასთან, როგორც ,,გირჩში“ აცხადებენ, სამწუხაროდ, თბილისის ზოოპარკში სირაქლემა არ აღმოჩნდა.
ზურაბ ჯაფარიძე 12 მაისს, რუსთაველის გამზირზე მიმდინარე აქციაზე დააკავეს. შსს „გირჩის“ ლიდერს ადმინისტრაციულ სამართალდარღვევათა კოდექსის 173-ე მუხლის დარღვევას ედავება, რაც პოლიციელების მოთხოვნებისადმი დაუმორჩილებლობას გულისხმობს.