საზოგადოება
გოგა ხაინდრავას სერიალში ,,9+1“ ციხის კადრების სცენარი ჩემი დაწერილია - ვლადიმერ ბედუკაძე
ვლადიმერ ბედუკაძის განცხადებით, რეჟისორ გოგა ხაინდრავას მიერ გადაღებულ სერიალში ,,9+1“, ციხის კადრების სცენარი მისი დაწერილია. ამის შესახებ ბედუკაძემ ტელეკომპანია ,,იბერიას“ ეთერში განაცხადა.
ბედუკაძის ინფორმაციით, ფილმში მსახიობებთან ერთად, ყოფილი პატიმრებიც მონაწილეობენ.
,,როდესაც შარშან ასეთი შემოთავაზება წამოვიდა ბატონი გოგასგან, მე არანაირი მორალური უფლება არ მქონდა, მეთქვა მისთვის უარი და არ დავთანხმებოდი, რომ ის ფაქტები, რაც საზოგადოებამ იხილა გახმაურებული ციხის კადრებით, მხატვრული სახით კვლავ ენახა საზოგადოებას და მაქსიმალურად მიახლოებულიყო რეალობას.
ამ ფილმში, მსახიობებთან ერთად, ყოფილი მსჯავრდებულებიც მონაწილეობენ. ფილმი მაქსიმალურად მიახლოებულია რეალობას. მე არ ვიცი დეტალები, გარკვეული პერიოდი ვიყავი ჩართული ამ ფილმში კონსულტანტად, გარკვეული პერიოდის მერე არ ვმონაწილეობდი. პირველი სცენარი, რაც ეხება ციხის კადრებს, ჩემს მიერ არის დაწერილი, ასევე, ყოფილი მსჯავრდებულების მიერ. შემდეგ როგორ განვითარდა და საბოლოო სახე რა მიიღო, ჩემთვის უცნობია. მე არ მომეცა საშუალება გადაღებას დავსწრებოდი“, - განაცხადა ლადო ბედუკაძემ.
ნაციონალური მოძრაობის 9 წლიან მმართველობაზე გადაღებული 24 სერიანი ფილმის პრემიერა 6 სექტემბერს გაიმართება.
მარი ნამგალაძე