საზოგადოება

HRW: საქართველოს არ გააჩნია დამოუკიდებელი, ეფექტიანი მექანიზმი სამართალდამცავების მიერ ჩადენილი დანაშაულების გამოსაძიებლად

Human Rights Watch-მა 2017 წლის მსოფლიო ანგარიში გამოაქვეყნა. 687-გვერდიან ანგარიშში ორგანიზაცია განიხილავს ადამიანის უფლებების პრაქტიკას 90-ზე მეტ ქვეყანაში.

ანგარიშში საქართველოც მოხვდა. სხვადასხვა თემებთან ერთად ყურადღება წამება, არასათანადო მოპყრობასა და პოლიციის მიერ ძალის გადამეტების საკითხსზე გამახვილდა.
როგორც საზოგადოებრივი მაუწყებლის მიერ Human Rights Watch-ის მიერ გამოქვეყნებული ანგარიშის თარგმანშია ნათქვამი, საერთაშორისო ორგანზიაცია მიიჩნევს, რომ საქართველოს არ გააჩნია დამოუკიდებელი, ეფექტიანი მექანიზმი სამართალდამცავების მიერ ჩადენილი დანაშაულების გამოსაძიებლად.

საერთაშორისო ორგანიზაციის ანგარიშში საუბარია კონკრეტულ ფაქტებზე. მაგალითის სახით მოყვანილია ივლისში, „საქართველოს ახალგაზრდა იურისტთა ასოციაციის“ მიერ გამოქვეყნებულ ანგარიშში ჩამოთვლილ შემთხვევებზე.

„2015 წლის ნოემბრიდან 12 თვის განმავლობაში, საია-ში 62 საჩივარი შევიდა სავარაუდო წამებისა და არასათანადო მოპყრობის თაობაზე; მათგან 45 ეხებოდა პოლიციის თანამშრომლების, ხოლო 17 ციხის თანამშრომლების მიერ ჩადენილ ქმედებებს. საია-ს ინფორმაციით, სახელმწიფო უწყებებმა ვერ შეძლეს ამ ბრალდებების ეფექტიანად გამოძიება.

აგვისტოში, 22 წლის დემურ სტურუამ თავი მოიკლა. წერილში, რომელიც თვითმკვლელობამდე დაწერა, ის ამბობდა, რომ ადგილობრივი პოლიციელი აიძულებდა, ინფორმაცია მიეწოდებინა იმ ადამიანებზე, რომლებსაც მარიხუანა მოჰყავდათ. გაკვეთის შედეგად დადგინდა, რომ სტურუას სხეულზე დაზიანებები აღენიშნებოდა, რომლებიც, პროკურორის თქმით, პოლიციელმა სტურუას გარდაცვალებამდე მიაყენა. პროკურატურამ სისხლის სამართლის საქმე აღძრა პოლიციელის წინააღმდეგ; წინამდებარე ანგარიშის მომზადების დროისთვის ეს საქმე კვლავ ძიებაში იყო. საქართველოს სახალხო დამცველის თქმით, ეს საქმე საქართველოს „რეპრესიული ნარკოპოლიტიკის“ შედეგების მკაფიო მაგალითია”. -ნათქვამია Human Rights Watch-ის ანგარიშში.