მსოფლიო

იერუსალიმში აშშ-ის საელჩო მაისში გადავა

აშშ თავის საელჩოს იერუსალიმში მაისში გახსნის, რითაც დაამთხვევს ისრაელის სახელმწიფოებრიობის 70-ე წლისთავს.

სახელმწიფო დეპარტამენტის თქმით, ახალი საელჩო განთავსებული იქნება შენობაში, სადაც ამჟამად აშშ-ის საკონსულო ოპერაციები ტარდება.

ვაშინგტონის განცხადებით, საელჩოს თანამშრომელთა დიდი ნაწილი თელ ავივში დარჩება, სანამ იერუსალიმში მდებარე შენობა არ გაფართოვდება. თუმცა იერუსალიმში გადავა აშშ-ის დესპანი ისრაელში დევიდ ფრიდმენი, რომელიც ლობირებდა იერუსალიმის ისრაელის დედაქალაქად აღიარების საკითხს ტრამპთან, თავის ერთ-ორ დამხმარესთან ერთად.

სახელმწიფო დეპარტამენტმა განაცხადა, რომ მომდევნო ეტაპი იქნება უსაფრთხო ადგილის მოძებნა იერუსალიმში ახალი საელჩოს ასაშენებლად, რაც „გრძელვადიანი ღონისძიება“ იქნება.

დონალდ ტრამპმა იერუსალიმი ისრაელის დედაქალაქად გასული წლის 6 დეკემბერს აღიარა.

ანა მებურიშვილი