საზოგადოება

ილია მეორე კავკასიის მუსლიმთა სულიერ ლიდერს შეხვდა

საქართველოს კათოლიკოს-პატრიარქი, უწმინდესი და უნეტარესი ილია მეორე საპატრიარქოში, კავკასიის მუსლიმთა სამმართველოს სულიერ ლიდერს შეიხ ულ ისლამ ალაჰ შუქურ ფაშა-ზადეს შეხვდა.

პატრიარქმა მუსლიმთა სულიერი ლიდერებისადმი მიმართვაში იმედი გამოთქვა, რომ აზერბაიჯანში ქართული კულტურული დაწესებულებები ისეთივე თავისუფალი არის, როგორც საქართველოში მუსლიმური.

„საქართველოში 400-მდე მეჩეთი და ჯამე, სკოლები და გამომცემლობებია. ჩვენ იმედი გვაქვს, რომ ქართული კულტურული დაწესებულებები ასევე თავისუფალი არის და იქნება აზერბაიჯანში“,- განაცხადა საქართველოს კათოლიკოს-პატრიარქმა.

უწმინდესის თქმით, იგი მოხარულია, რომ ურთიერთობა, რომელიც წლების მანძილზე ორ ქვეყანას შორის არსებობდა, დღეს ვითარდება და ძლიერდება.

თავის მხრივ, შეიხ ულ ისლამ ალაჰ შუქურ ფაშა-ზადემ განაცხადა, რომ „მთელ მსოფლიოში შესაძლოა, ანალოგი არ მოიძებნოს იმას, რომ მუსლიმური რელიგიის შეიხი პატრიარქს ეწვევა, ხელზე კოცნის მას, აღიარებს მას თავის უხუცესად. მე მსურს ქართველმა ხალხმა გაიგოს და აქ დამსწრე მუსლიმებმაც, რომ მისი უწმინდესობა, კათოლიკოს-პატრიარქი ილია მეორე გახლავთ უიშვიათესი ადამიანი“.

მან ასევე აღნიშნა, რომ საქართველოში პატრიარქის მოსანახულებლად ჩამოვიდა, როდესაც შეიტყო, რომ მისი უწმინდესობა შეუძლოდ იყო, გადაწყვიტა გერმანიაში მოენახულებინა, თუმცა ეს ვერ განხორციელდა, ამიტომ უწმინდესს დღეს თბილისში ეწვია.

მონიკა დავლიანიძე