საზოგადოება

ინდუსტრიაში დასაქმებულთა გლობარული კავშირის გენერალური მდივანი საქართველოს პრეზიდენტს რუსთავის „აზოტის“ საქმეში ჩარევას სთხოვს

ინდუსტრიაში დასაქმებულთა გლობარული კავშირის IndustriALL Global Union-ის გენერალური მდივანი ვალტერ სანჩესი საქართველოს პრეზიდენტისგან გიორგი მარგველაშვილისგან ითხოვს, ჩაერიოს რუსთავის „აზოტიდან“ გათავისუფლებული მუშების საქმეში. აღნიშნულის შესახებ მის ოფიციალურ მიმართვაში წერია.

სანჩესი მიმართავს საქართველოს პირველ პირს, რომ რუსთავის „აზოტის“ ხელმძღვანელობის მხრიდან შეჩერდეს დასაქმებულთა უფლებების დარღვევა. გენერალური მდივანი წერს, რომ „აზოტში“ მძიმე სამუშაო პირობებია, ხოლო საწარმოში დარჩენილ მუშებს წვრილი შრიფტით დაწერილი „5-გვერდიანი კონტრაქტების ხელწმოწერას აიძულებენ“. განცხადებაში წერია, რომ მუშებს არ აძლევენ შესაძლებლობას, გაეცნონ კონტრაქტის პირობებს.

განცხადების დასასრულს სანჩესი სთხოვს პრეზიდენტს, რომ მთავრობამ აღადგინოს სამუშაოზე 350 დათხოვნილი მუშა, ასევე სასწრაფო წესით გაუქმდეს ახალდადებული კონტრაქტები. Global Union-ის გენერალური მდივანი ასევე წერს, რომ მომავალი კონტრაქტების დადების პროცესი პროფკავშირების მონაწილეობით უნდა ჩატარდეს.

Industriall Global Union არის ინდუსტრიაში დასაქმებულთა გლობარული კავშირი, რომელიც აწევრიანებს 140 ქვეყნის, 600 დარგობრივი პროფკავშირის, 50 მილიონზე მეტ წევრს. მასში ასევე შედის რუსთავის „აზოტის“ პროფკავშირი და საქართველოს მეტალურგიული და სამთო მრეწველობის მუშაკთა პროფკავშირები.

შეგახსენებთ, რომ 26 იანვარს რუსთავის „აზოტიდან“ 350 ადამიანი გაათავისუფლეს. მიზეზად საწარმოში მიმდინარე რეორგანიზაცია დასახელდა.

ანა მებურიშვილი