პოლიტიკა

ირაკლი სესიაშვილის ინიციატივით, სამხედრო სამსახურისგან მოტყუებით თავის არიდება ჯარიმით ან 3 წლამდე თავისუფლების აღკვეთით დაისჯება

პარლამენტის თავდაცვისა და უშიშროების კომიტეტის თავმჯდომარის, ირაკლი სესიაშვილის განცხადებით, სამხედრო სავალდებულო სამსახურისთვის თავის არიდებასთან წამოყენებული ინიციატივა შეიძლება შეეხოს „გირჩის“ მიერ შექმნილ რელიგიურ ორგანიზაციას.

მისი თქმით, სამუშაოა კანონის იმ ხარვეზებზე, რომელიც უნდა ამოქმედდეს იმ შემთხვევაში, თუკი პირი მოტყუებით დააღწევს თავს სამხედრო სამსახურს.

„რაც შეეხება "გირჩის" მიერ ინიცირებულ რელიგიურ ორგანიზაციას და ამის საშუალებით კონსტიტუციური ვალდებულებისთვის თავის არიდების მცდელობას გარკვეული წვევამდელების მხრიდან - ეს საკითხი პარლამენტის გადასაწყვეტი არ არის. ამ შემთხვევაში, ამ ცვლილებების შემდეგ, თუკი სამხედრო პოლიცია ჩათვლის, რომ თავის არიდების საფუძველი იყო მოტყუება, ცხადია, შესაძლებელია ამ მიმართულებითაც კანონის გამოყენება. თუმცა პარლამენტის და პოლიტიკის განსაზღვრის მიზანი არ არის, რომ ვიღაცის წინააღმდეგ რაღაც გავაკეთოთ. ფაქტია, რომ ხარვეზი იყო კანონში და ჩემთვის მთავარია, ეს საკითხი დარეგულირდეს“,- განაცხადა სესიაშვილმა.

სამხედრო სავალდებულო სამსახურისთვის თავის არიდებასთან დაკავშირებული ინიციატივის ავტორია ირაკლი სესიაშვილი. მისი განხილვა თავდაცვისა და ადამიანის უფლებათა დაცვის კომიტეტების გაერთიანებულ სხდომაზე იგეგმება. მოხდება დაზუსტება, წვევამდელის მიერ სამხედრო სამსახურისგან თავის არიდების რა მიზეზი გამოიწვევს სისხლის სამართლის პასუხისმგებლობას. ცვლილებათა პაკეტის თანახმად, წვევამდელის მიერ ავადმყოფობის სიმულაცია, განზრახ თვითდაზიანება, ყალბი დოკუმენტების გამოყენება ან სხვა ტიპის მოტყუება დაისჯება ჯარიმით ან 3 წლამდე თავისუფლების აღკვეთით.

ანა მებურიშვილი