პოლიტიკა

ირმა ინაშვილმა USAID-ის წარმომადგენლებს მოსაზრებები გააცნო საქართველოში დემოკრატიის განვითარებას ხელშემწყობი პროექტების შესახებ

პარლამენტის თავმჯდომარის მოადგილე ირმა ინაშვილი საქართველოში ვიზიტით მყოფ ამერიკის შეერთებული შტატების საერთაშორისო განვითარების სააგენტოს (USAID) ვაშინგტონის ოფისის წარმომადგენლებს შეხვდა.

სტუმრების განცხადებით, 2019 წლიდან ახალი პროექტების მიზნობრივი ინიცირებისთვის მათთვის მნიშვნელოვანია ადგილობრივი საჭიროებების ცოდნა.

პარლამენტის თავმჯდომარის მოადგილემ, ირმა ინაშვილმა USAID-ის წარმომადგენლებს მოსაზრებები გააცნო იმ პროექტების შესახებ, რომელთა განხორციელებაც, მისი შეფასებით, საქართველოში დემოკრატიის განვითარებას ხელს შეუწყობს.

საქართველოს პარლამენტის ინფორმაციით, შეხვედრაზე განხილული იყო, ასევე პოლიტიკური პარტიების ინსტიტუტის გაძლიერების ხელშეწყობის საკითხები ხალხთან კომუნიკაციისა დ საერთაშორისო პარტნიორებთან თანამშრომლობის კუთხით.

ირმა ინაშვილის აშშ-ის საერთაშორისო განვითარების სააგენტოს (USAID) ვაშინგტონის ოფისის წარმომადგენლებთან შეხვედრას ესწრებოდა ფრაქცია „საქართველოს პატრიოტების“ თავმჯდომარე გიორგი ლომია.