მსოფლიო
ისრაელის ჯართან შეტაკებისას 58 პალესტინელი დაიღუპა
ღაზას სექტორის საზღვართან ისრაელის ჯართან დაპირისპირების შედეგად 58 პალესტინელი დაიღუპა. პალესტინელები აპროტესტებდნენ იერუსალიმში აშშ-ის საელჩოს ოფოციალურ გახსნას, რაც შეტაკებაში გადაიზარდა.
პალესტინელთა თქმით, დაპირისპირების შედეგად დაახლოებით 2700 ადამიანი დაშავდა.
პალესტინელთა 7-კვირიანი საპროტესტო მოძრაობის განმავლობაში გუშინდელი შეტაკება ყველაზე სისხლიანი აღმოჩნდა.
პალესტინელები აქციას დღესაც გეგმავენ, რაც ემთხვევა „ნაკბას“ 70-ე წლისთავს - ამ დღეს იხსენებენ პალესტინელთა მასობრივ განდევნას, რაც მოჰყვა 1948 წლის ომსა და ისრაელის შექმნას.
ისრაელის პრემიერ-მინისტრმა ბენიამინ ნეთანიაჰუმ განაცხადა, რომ ისრაელის ჯარი იცავდა თავს ტერორისტული ორგანიზაცია ჰამასის რადიკალური დაჯგუფებებისგან, რომელსაც, მისი თქმით, ისრაელის განადგურება სურს.
ისრაელის თავდაცვითი ძალების პრესსამსახურის განცხადებით, ებრაელმა ჯარისკაცებმა ცეცხლი გაუხსნეს იმ ადამიანებს, ვინც „ეწეოდა ტერორისტულ საქმიანობას“, ხოლო დემონსტრანტების წინააღმდეგ გამოიყენეს ცრემლსადენი გაზი.
ოფიციალური იერუსალიმის თქმით, არეულობაში 40 000-მა პალესტინელმა მიიღო მონაწილეობა, რომლებიც ისრაელი-ღაზას საზღვრის 13 მონაკვეთზე ცდილობდნენ საზღვრის გარღვევას.
პალესტინელები ებრაელ ჯარისკაცებს ქვებსა და ყუმბარებს ესროდნენ.
პალესტინის ხელმძღვანელმა მაჰმუდ აბასმა გუშინდელ შეტაკებაზე კომენტირებისას განაცხადა, რომ პალესტინელთა „ხოცვა - ჟლეტა“ გრძელდება. პალესტინაში 3-დღიანი გლოვაა გამოცხადებული.
ცნობისთვის, წინა წლის დეკემბერში დონალდ ტრამპმა იერუსალიმი ისრაელის დედაქალაქად აღიარა, რასაც მოჰყვა პალესტინელთა უკმაყოფილება. ქალაქის სტატუსი ერთ-ერთი სადაო საკითხია ისრაელ-პალესტინის კონფლიქტში. პალესტინელები მიიჩნევენ, რომ იერუსალიმის აღმოსავლეთი ნაწილი მათი მომავალი სახელმწიფოს დედაქალაქი უნდა გახდეს.