პოლიტიკა

ისრაელის ქნესეთის ვიცე-სპიკერი ირაკლი კობახიძეს შეხვდა

საქართველოში სამუშაო ვიზიტით მყოფი ისრაელის პარლამენტის (ქნესეთის) ვიცე-სპიკერი, საქართველოსთან მეგობრობის ჯგუფის ხელმძღვანელი ხილიკ ბარი საქართველოს პარლამენტის თავმჯდომარეს ირაკლი კობახიძეს შეხვდა.

შეხვედრაზე მხარეებმა ისრაელ-საქართველოს მომავალი ურთიერთობებსა და საპარლამენტო თანამშრომლობის გაღრმავებაზე ისაუბრეს. განიხილეს ოქტომბერში საქართველოს პარლამენტის თავმჯდომარის ისრაელში მოსალოდნელი ვიზიტის საკითხი.

ირაკლი კობახიძის თქმით, ისრაელი საქართველოს მეგობარი ქვეყანაა და მისი ვიზიტიც ქვეყნებს შორის მრავალმხრივი თანამშრომლობის საკითხებს შეეხება.

ქნესეთის ვიცე-სპიკერის ხილიკ ბარის აზრით, მნიშვნელოვანია, მხარეებმა პირდაპირი ურთიერთობები გააქტიურონ და დღის წესრიგში დასვან ორი სახელმწიფოს კავშირების გაღრმავებისთვის აქტუალური საკითხები.

მხარეები შეთანხმდნენ, რომ საქართველოს პარლამენტის თავმჯდომარის ისრაელში ვიზიტი სათავეს დაუდებს ქვეყნებს შორის ურთიერთობების მაღალ დონეზე აყვანასა და ახლებურ მიდგომებს.

შეხვედრას ესწრებოდნენ საქართველოს პარლამენტის თავმჯდომარის პირველი მოადგილე, ისრაელის პარლამენტთან მეგობრობის ჯგუფის ხელმძღვანელი თამარ ჩუგოშვილი და „ისრაელის სახლის“ ხელმძღვანელი იციკ მოშე.