პოლიტიკა

„ისრაელის სახლის“ მეთოდიკამ კიდევ ერთი საერთაშორისო აღიარება მოიპოვა

ისრაელის პოლიტიკურმა ელიტამ „ისრაელის სახლის“ კონცეფციისადმი კიდევ ერთხელ გამოხატა მხარდაჭერა. ჰასბარასა (ისრაელის წარმოდგენა) და ქვეყნებს შორის ურთიერთობის „ისრაელის სახლის“ მეთოდიკას ამჯერად ისრაელის ერთ-ერთი წამყვანი, საპარლამენტო პარტია „ავოდას“ ლიდერი, ყოფილი თავდაცვის მინისტრი ამირ ფერეცი ოფიციალური წერილით გამოეხმაურა.

წერილი პარტიის ლიდერმა „ისრაელის სახლის“ დამფუძნებელსა და ხელმძღვანელს იციკ მოშეს გაუგზავნა. ფერეცი მას თბილისში ვიზიტის შთაბეჭდილებებს უზიარებს და „ისრაელის სახლის“ საქმიანობაზე წერს: ეს არის მოდელი, რომლის 100 ქვეყანაში გადატანას მხარს ვუჭერ. ეს მეთოდი უნდა გახდეს განხილვის თემა მთავრობის სხდომებსა და საგარეო ურთიერთობებზე მომუშავე უწყებებში, რადგან მნიშვნელოვანია ისრაელის საგარეო პოლიტიკისთვის.

ამირ ფერეცი თბილისში ცოტა ხნის წინათ იმყოფებოდა. ის საქართველოს სპეციალურად „ისრაელის სახლის“ საქმიანობის გასაცნობად ეწვია. „ისრაელის სახლის“ დამფუძნებლისა და ყოფილ საბჭოთა კავშირში მსოფლიო ებრაული სააგენტოს წარმომადგენლობის პირველი ხელმძღვანელისგან, იციკ მოშესგან მოისმინა დაწვრილებითი ინფორმაცია 30 წლის წინათ დიდი ალიის დაწყების პერიპეტიებსა და ბოლო 6 წლის განმავლობაში „ისრაელის სახლის“ ეგიდით ჰასბარას კამპანიისა და ისრაელ-საქართველოს შორის სახელმწიფოებრივი ურთიერთობების განვითარების შესახებ.

ვიზიტისას ამირ ფერეცმა პარტია „ავოდას“ კიდევ ერთ ლიდერთან, ხილიკ ბართან ერთად გრიგოლ რობაქიძის სახელობის უნივერსიტეტში წაიკითხა საჯარო ლექცია, თემაზე: „ისრაელის წინაშე არსებული გამოწვევები და მიღწევები“. მან 22 ოქტომბერს, ისრაელის 30-კაციან დელეგაციასთან ერთად მონაწილეობა მიიღო, აგრეთვე, სასტუმრო „ვინდამ გრანდში“ „ისრაელის სახლის’ მიერ ორგანიზებულ ებრაული კულტურის ევროპული დღესადმი მიძღვნილ ღონისძიებაში..

„ისრაელის სახლის“ მეთოდიკამ მიმდინარე კვირაში კიდევ ერთი საერთაშორისო აღიარებაც მოიპოვა. პრაღაში 24-25 ოქტომბერს ორგანიზაცია „ევროპული ალიანსი ისრაელისთვის“ (EAI) ფორუმზე ალიანსს „ისრაელის სახლის“ მმართველთა საბჭოს თავმჯდომარემ იამით მოსკოვიჩმა ორგანიზაციის კონცეფცია და ბოლო 6 წლის საქმიანობა დეტალურად გააცნო. ფორუმს ევროპის ქვეყნების პარლამენტების ისრაელთან მეგობრობის ჯგუფის ხელმძღვანელები ესწრებოდნენ. EAI-ის წევრთა შეფასებით, „ისრაელის სახლის“ ისრაელის ჰასბარას მეთოდიკა უნივერსალურია და ის უნდა გაიზიაროს პროისრაელურმა ორგანიზაციებმა და ევროპაში საზოგადოებრივი აზრი შექმნაში მონაწილე გაერთიანებებმა.

„ისრაელს სახლის“ ხელმძღვანელის იციკ მოშეს თქმით, იმის მიუხედავად, რომ პირად, მერკანტილურ ინტერესებზე ორიენტირებულ ადამიანთა, მათ შორის ოფიციალურ სტატუსს ამოფარებულ პირთა ნაწილი ცდილობს ხელი შეუშალოს „ისრაელის სახლს“ სახელმწიფო მნიშვნელობის მიზნების განხორციელებაში, ორგანიზაციამ უკვე მიიღო მაღალი დონის ოფიციალური მხარდაჭერა, საერთაშორისო ასპარეზზე კი ჩამოყალიბდა როგორც მწყობრი პროისრაელური და მეგობარ ქვეყანასთან სახელმწიფოებრივი ურთიერთობებისთვის იმპულსის მიმცემი გაერთიანება. ამაზე მეტყველებს ისრაელის გავლენიანი პოლიტიკოსების, ცნობილი მოღვაწეებისა და მედიის პოზიცია „ისრაელის სახლის“ მიმართ. ამირ ფერეცის წერილი და „ევროპული ალიანსი ისრაელისთვის“ (EAI) პრაღის ფორუმიც ნათქვამის კიდევ ერთი დადასტურებაა.