კომენტარი
კანონის შესაბამისად, მკაცრად დაისჯება ყველა, ვისი ბრალეულობაც მომხდარში დადასტურდება - გიორგი კვირიკაშვილი
საქართველოს პრემიერ-მინისტრის, გიორგი კვირიკაშვილის განცხადებით, ბარათაშვილის ქუჩაზე, შენობიდან ფანჯრის მინის ჩამოვარდნის შედეგად მომხდართან დაკავშირებით, ყველა შესაბამისი სამსახური მობილიზებულია.
მთავრობის ხელმძღვანელის ინფორმაციით, ყველა შესაბამისი უწყება მზად არის, რომ საჭიროების შემთხვევაში უზრუნველყოფონ დაშავებული ბავშვების საზღვარგარეთ გადაყვანა.
პრემიერის განცხადებით, კანონის შესაბამისად, მკაცრად დაისჯება ყველა, ვისი ბრალეულობაც მომხდარში დადასტურდება.
ადგილზე ვითარებას გაეცნენ ჯანდაცვის მინისტრის მოადგილე ზაზა სოფრომაძე, განათლებისა და მეცნიერების მინისტრის მოადგილე ლია გიგაური და პარლამენტის ჯანდაცვისა და განათლების კომიტეტების თავმჯდომარეები - აკაკი ზოიძე და მარიამ ჯაში.
ცნობისათვის, დღეს ბარათაშვილის ქუჩაზე შენობის გარე ფასადიდან მინის ჩამოვარდნის შედეგად ქვეითად მოსიარულე 6 მოსწავლე დაშავდა. ერთ-ერთი მათგანის ჯანმრთელობის მდგომარეობა მძიმეა.
საქმეზე გამოძიება საქართველოს სსკ-ის 124-ე მუხლით მიმდინარეობს, რაც გაუფრთხილებლობით ჯანმრთელობის ნაკლებად მძიმე ან მძიმე დაზიანებას გულისხმობს.