საზოგადოება
კანონით შესაძლებელია იმ შენობა-ნაგებობებში ცხოვრება, რომელიც ექსპლუატაციაში არ არის მიღებული - კახა კალაძე
თბილისის მერი, საგანგებო ბრიფინგზე ერთ-ერთი მედიასაშუალების მიერ გავრცელებულ ინფორმაციას გამოეხმაურა, სადაც დიდ დიღომში მომხდარი ტრაგედია შენობის ექსპლოატაციაში მიღების საკითხს და კორუფციულ სქემას დაუკავშირეს.
თბილისის მერი განმარტავს, რომ შენობაში ბუნებრივი აირის ქსელების უსაფრთხოება, მოქმედი კანონმდებლობით, არავითარ კავშირში არ არის შენობის ექსპლოატაციაში მიღებასთან.
რაც შეეხება კანონს, რომელიც განსაზღვრავს ექსპლუატაციაში მიუღებელ შენობებში ცხოვრების უფლებას, კალაძემ ბრიფინგზე „ არქიტექტურულ და სამშენებლო საქმიანობაზე სახელმწიფო ზედამხედველობის შესახებ“ კანონზე და იმ ნორმებზე ისაუბრა, რომელიც შენობა-ნაგებობის ექსპლუატაციაში მიღებამდე მასში ცხოვრების უფლებას გულისხმობს.
„2006 წელს ამ კანონში იყო მე-5 მუხლი. მასში იყო მთელი რიგი ჯარიმები ანუ კანონით იყო აკრძალული იმ შენობა- ნაგებობებში შესვლა და ცხოვრება, რომელიც არ იყო მიღებული ექსპლუატაციაში. კანონში 2009 წელს განახორციელეს ცვლილება და ეს მეხუთე მუხლი საერთოდ ამოიღეს კანონიდან. დღეს კანონით ადამიანებს თავისუფლად შეუძლიათ იმ შენობა-ნაგებობებში შესვლა, რომელიც ექსპლუატაციაში არ არის მიღებული“-აცხადებს კალაძე.
კალაძემ იმ ცვლილებებზეც ისაუბრა, რომელიც 2018 წელს განხორციელდა.
„10-ჯერ გაიზარდა შეჩერებული მშენებლობების უნებართვოდ გაგრძელებაზე და 50 ათასი გახდა. 2,5 ჯერ გაიზარდა ჯარიმა უნებართვო მშენებლობაზე და 25 ათასი გახდა. 4-ჯერ გაიზარდა პროექტის დარღვევით მშენებლობის წარმოებაზე და 15 ათასი გახდა. სამშენებლო მოედანზე უსაფრთხოების წესების დარღვევაზე გაიზარდა 10-ჯერ და 30 ათასი გახდა.
ზედამხედველობის სამსახური ბაზაზე შეიქმნა მუნიციპალური ინსპექცია, რომლის რესურსი 2-ჯერ გაიზარდა და დღეისთვის 300 ადამიანისგან შედგება, რომლებიც სამშენებლო დარღვევებზე რეგირებენ. დაგვემატა ხმაურის რეგულირება და მოწესრიგება. ცვლილებების შედეგად, რაც განვახორციელეთ 2018 წლის განმავლობაში, გამოწერილ იქნა 10 მილიონ ლარზე მეტი ჯარიმა“,-აცხადებს კახა კალაძე.