კომენტარი

ხელისუფლებასა და მოსახლეობას შორის გარკვეულწილად, თითქმის დაიკარგა, ან ძალიან შესუსტდა კონტაქტი და კომუნიკაცია - თამარ ჩუგოშვილი

არჩევნების მეორე ტურამდე ჩვენს წარმომადგენლებს, დეპუტატებს, მინისტრებს ექნებთ ძალიან აქტიური შეხვედრები ამომრჩევლებთან, მოსახლეობასთან, მაგრამ ეს არ შეიძლება იყოს მხოლოდ წინასაარჩევნოდ, ეს უნდა გაგრძელდეს მუდმივად, - განუცხადა ჟურნალისტებს პარლამენტის ვიცე-სპიკერმა თამარ ჩუგოშვილმა.

მისი თქმით, ერთ-ერთი მთავარი, რაც საპრეზიდენტო არჩევნების პირველმა ტურმა აჩვენა, არის ის, რომ ხელისუფლებასა და მოსახლეობას შორის გარკვეულწილად, თითქმის დაიკარგა, ან ძალიან შესუსტდა კონტაქტი და კომუნიკაცია.

"თუ ხელისუფლება არ არის ძალიან აქტიურ კომუნიკაციაში თავის საზოგადოებასთან, ის კარგავს ადეკვატურობას, ის კარგავს მაჯის ცემას, შეგრძნებას, საზოგადოებას რა აწუხებს. შესაბამისად, შემდგომ დგება მძიმე შედეგები. ამ დღეებში, ამ პერიოდის განმავლობაში ჩვენს წარმომადგენლებს, ჩვენს დეპუტატებს, ჩვენს მინისტრებს ექნებათ ძალიან აქტიური შეხვედრები თავად ამომრჩევლებთან, მოსახლეობასთან, მაგრამ ეს არ შეიძლება იყოს მხოლოდ წინასაარჩევნოდ, ეს უნდა გაგრძელდეს მუდმივად. სხვანაირად ჩვენ ისევ შეგვექმნება საფრთხე, რომ ის შეგრძნებები, რაც მოსახლეობაში არის, დავკარგოთ, ამიტომ კომუნიკაცია უნდა იყოს მუდმივი", - განაცხადა ჩუგოშვილმა.