საზოგადოება

კონგოში დატყვევებული ქართველი მფრინავი, შესაძლოა გარდაცვლილი იყოს - საგარეო უწყება

კონგოში, 27 იანვარს, დატყვევებული ქართველი მფრინავი სოსო ოსურაული შესაძლოა, გარდაცვლილი იყოს.

ამის შესახებ საგარეო საქმეთა მინისტრის მოადგილემ ზვიად გონაძემ ბრიფინგზე განაცხადა.

მანამდე კი, გონაძემ ქართველი მფრინავის ძმას შეხვდა და პირადა გააცნო მის ხელთ არსებული ინფორმაცია.

გონაძის განმარტებით, გავრცელებული ინფორმაციით, კონგოში დაპირისპირებულ მხარეებს შორის შეტაკება მოხდა, რომელსაც მსხვერპლი მოჰყვა. საგარეო უწყების ვარაუდით, შეტაკების დროს გარდაცვლილთა შორის, შესაძლოა სოსო ოსურაულიც იყოს.

„დაპირისპირებულ მხარეებს შორის მოხდა შეტაკება, რომელსაც მოჰყვა მსხვერპლი და სამწუხაროდ, შესაძლოა იოსებ ოსურაულიც იყოს მათ როცხვში. ამ ინფორმაციის მიღებისთანავე ჩვენ ყველა მხარეს კონგოს, გაერო-ს, წითელ ჯვარს ფაქტის დადასტურება ვთხოვეთ. დღეისათვის დასტური არც ერთი მხარისგან არ გვაქვს. ამ პერიოდის განმავლობაში მთავრობის მიერ არაერთი ნაბიჯი გადაიდგა და ჩვენს ხელთ არსებული ყველა რესურსი გამოვიყენეთ. ოსურაულის დასახსნელად საქართველოს ელჩი რეგიონში იმყოფებდა და ყველა მხარესთან კონსულტაციები იმართებდა, მაგრამ სიტუაციას ადგილზე შექმნილი მდგომარეობა ართულებდა, რომელიც ბოლო პერიოდში კიდევ უფრო გართულდა. მიუხედავად ყველაფრისა, ჩვენი მოქალაქის ბედ-იღბლის გარკვევას ჩვენ მომავალშიც გავაგრძელებთ“,-აღნიშნა საგარეო საქმეთა მინისტრმა.

კონგოში ქართველი მფრინავი სოსო ოსურაული ადგილობრივმა მეამბოხეებმა 27 იანვარს დაატყვევეს.

კონგოს სამხედრო-საჰაერო ძალების ორი შვეულმფრენი მეამბოხეებმა ჩამოაგდეს. ერთ-ერთს ქართველი მფრინავი მართავდა, რომელიც მეამბოხეებმა ტყვედ აიყვანეს.

სოსო ოსურაული თავდაცვის სამინისტროს შეიარაღებული ძალებიდან 2015 წელს საკუთარი განცხადების საფუძველზე წავიდა და მუშაობა კონგოში, კერძო საავიაციო კომპანიაში დაიწყო.

მონიკა დავლიანიძე