საზოგადოება

კონკურსი „მე ომბუდსმენი 2016“ – გამარჯვებულთა დაჯილდოება გაიმართა

საქართველოს სახალხო დამცველმა უჩა ნანუაშვილმა, ევროკავშირის ელჩმა საქართველოში იანოშ ჰერმანმა, საქართველოს განათლებისა და მეცნიერების მინისტრის მოადგილემ ლია გიგაურმა და საპარლამეტო უმრავლესობის ლიდერმა არჩილ თალაკვაძემ კონკურსის „მე ომბუდსმენი 2016“ გამარჯვებული მოსწავლეები დააჯილდოვეს.

2016 წელს კონკურსი „მე ომბუდსმენი“ მეშვიდედ გაიმართა. თამაში 10 ოქტომბერს დაიწყო და რეგისტრაცია 864 გუნდმა – 1728 მოსწავლემ გაიარა. პირველი და მეორე ტურის გავლის შემდეგ, მესამე, საფინალო რაუნდში მხოლოდ 11 გუნდი და შესაბამისად 22 მოსწავლე გავიდა. ფინალური რაუნდის ნაშრომები 3 დამოუკიდებელი ექსპერტისგან შემდგარმა ჟიურიმ შეაფასა.

„მე ომბუდსმენის“ მთავარი მისია მდგომარეობს იმაში, რომ თქვენ და თქვენმა თანატოლებმა მიიღოთ ინფორმაცია სახალხო დამცველის და ზოგადად ადამიანის უფლებების შესახებ. მე მჯერა, რომ ამ კონკურსის დროს მიღებული ცოდნა დაგეხმარებათ გახდეთ ქვეყნის ღირსეული მოქალაქეები და დაიცვათ თქვენი და სხვათა უფლებები“, – განაცხადა სახალხო დამცველმა და გამარჯვება მიულოცა ფინალში გასულ მოსწავლეებს. უჩა ნანუაშვილმა ასევე, მადლობა გადაუხადა ევროკავშირს და საქართველოს განათლებისა და მეცნიერების სამინისტროს – კონკურსის ფინანსური და ორგანიზაციული მხარდაჭერისათვის.

კონკურსში „მე ომბუდსმენი 2016“ პირველი ადგილი ფოთის N15 საჯარო სკოლის მოსწავლეებმა ნინი ხაინდრავამ და ჯულიეტა ჯანელიძემ დაიკავეს (გუნდი „ჯუნი“), მეორე ადგილზე გავიდნენ ზესტაფონის მუნიციპალიტეტის ქვედა საზანოს N1 საჯარო სკოლის მოსწავლეები მარიამ თორთლაძე და ნანა აფრიდონიძე (გუნდი „ოლიმპო“), ხოლო მესამე ადგილი საჩხერის მუნიციპალიტეტის სოფელ ჩიხის სკოლის მოსწავლეებს გვანცა ჭიღლაძესა და თამარ ჭიღლაძეს ერგოთ (გუნდი „თამარიონი“). მათ საჩუქრად ლეპტოპები, „აიპადები“ და პლანშეტური კომპიუტერები გადაეცათ.

ფინალში მონაწილე ყველა მოსწავლემ: ეთერ და ქეთევან კენჭოშვილებმა, ქეთა თავბერიძემ, გივი აბესაძემ, ლიზა ელიავამ, ალექსანდრა მატკავამ, აკაკი აბზიანიძემ, ირაკლი ნანავამ, ეკატერინე გეგეჭკორმა, ნინო ჭედიამ, ეკატერინე რუხაიამ, გიორგი ცხვიტარიამ, ალექსანდრე ნანეიშვილმა, ლევან გორგაძემ, ვალერი სიდამონიძემ და ირაკლი კაკულიამ სამახსოვროდ სერტიფიკატები, საქართველოს ისტორიის ოთხტომეული, ჩანთები და სხვა საჩუქრები მიიღეს.