პოლიტიკა

კონტრაქცია ნიშნავს, რომ „ქართული ოცნების“ ბოლო ჟამია - სოფო ჯაფარიძე

კონტრაქცია ნიშნავს იმას, რომ ეს არის „ქართული ოცნების“ ბოლო ჟამი - ისინი ყველაფერს აკეთებენ იმისთვის, რომ დაუპირისპირონ ამ გულწრფელ და გულანთებულ ქართველებს ის ადამიანები, რომლებიც ძალით მოჰყავთ აქციაზე , - ამის შესახებ საქართველოს მესამე პრეზიდენტის, მიხეილ სააკაშვილის პირადმა წარმომადგენელმა სოფო ჯაფარიძემ, 29 აპრილს „ქართული ოცნების“ მიერ დაანონსებულ შეკრებასთან დაკავშირებით განაცხადა.

მისი თქმით, კანონდარღვევაა, როდესაც სამსახურებს საჯარო მოხელეებისგან ცლიან.

„პირველ რიგში, აუცილებლად უნდა ვთქვათ, რომ ეს არის კანონის დარღვევა, როდესაც სამსახურებს ცლი საჯარო მოხელეებისგან. ასევე, ეს არ არის მხოლოდ კანონდარღვევა, ეს არის მორალური ზიანის მიყენება იმ ადამიანებისთვის, ვისი შვილებიც დგანან გარეთ და იბრძვიან ჩვენი ქვეყნის უკეთესი მომავლისთვის.

ჩვენ ძალიან ბევრი კონტრაქცია გვინახავს და ისიც გვინახავს შემდგომ როგორ დასრულებულა. ეს ნიშნავს იმას, რომ ეს არის „ქართული ოცნების“ ბოლო ჟამი, ისინი ყველაფერს აკეთებენ იმისათვის, რომ ხელოვნურად დაუპირისპირონ ამ გულწრფელ და გულანთებულ ადამიანებს, ქართველებს, ის ადამიანები, რომლებიც ძალით მოჰყავთ აქციაზე. ეს არის მათი ბოლო ჟამი, ეს მათ ძალიან კარგად იციან.

დიახ, დღეს ქართველმა ხალხმა გაიმარჯვა, დღეს საქართველოში „ქართული ოცნება“ არის დამთავრებული. ჩვენ, აუცილებლად ყველა ერთად, კიდევ ერთხელ და სამუდამოდ ვეტყვით „რუსულ კანონს“ და „რუსულ ოცნებას“ არას!“, - განაცხადა სოფო ჯაფარიძე.