სამართალი

მე არ დამიდასტურებია რომ ოთარ აბესაძემ ბრალი აღიარა - ირმა ჭკადუა

ქრთამის აღების ბრალდებით დაკავებულ მერიის თანამშრომელს ოთარ აბესაძეს ბრალს დღეს წარუდგენენ. ბრალდებულის დაცვის მხარეს საქმის მასალები გადაეცა.

ამის შესახებ მედიას ე.წ მოდულის შენობიდან გამოსულმა აბესაძის ადვოკატმა, ირმა ჭკადუამ განუცხადა.

„ჩავიბარე საქმის მასალები. ჯერ არ მინახია, საკმაოდ მოცულობითია. გავეცნობი და შემდგომ მოგახსენებთ. რაც შეეხება ბრალს, ამ წუთისთვის ჩვენთვის ცნობილი არ არის, რომელ საათზე წარუდგენენ მას ბრალს, ვინაიდან, გამოძიებას ბრალის წარსადგენად დრო ღამის 21:00 საათამდე აქვს“,-აღნიშნა ადვოკატმა.

გარდა ამისა, ირმა ჭკადუამ, გუშინ მედიაში გავრცელებული ინფორმაცია განმარტა, იმის შესახებ რომ აბესაძემ ბრალი აღიარა.

„მე არ დამიდასტურებია, მე სხვადასხვა კითხვები დამისვეს და ერთ-ერთ კითხვაზე ვპასუხობ „დიახს“. გამომდინარე იქიდან, რომ მას ჯერ ბრალი არ წარსდგენია, ვერანაირ ბრალს ვერ აღიარებდა, და არანაირ ბრალზე, ან ზოგადად საქმეზე საუბარი ჩვენ არ გვქონია“,-განმარტა ადვოკატმა.

მონიკა დავლიანიძე