პოლიტიკა

მე მაქვს მეილი, სადაც ტომას მარკერტი მიდასტურებს, რომ ვენეციის კომისიის დასკვნა პრეზიდენტსაც გაეგზავნა- თამარ ჩუგოშვილი

საქართველოს პარლამენტის ვიცე-სპიკერმა თამარ ჩუგოშვილმა პრეზიდენტის საპარლამენტო მდივნის, ანა დოლიძის განცხადებას უპასუხა, რომლის თანახმად, პრეზიდენტს არ მიუღია ვენეციის კომისიის წინასწარი დასკვნა.

ჩუგოშვილის თქმით, მას აქვს ელექტრონული ფოსტის მიმოწერა, რომელიც ადასტურებს, რომ პრეზიდენტს გაეგზავნა ვენეციის კომისიის დოკუმენტი.

„ჩვენ იმ პირობას ვასრულებდით, რა პირობაც ვენეციის კომისიისთვის გვქონდა მიცემული. ვინაიდან პრეზიდენტის ადმინისტრაციის წარმომადგენელმა განაცხადა, რომ მას დასკვნა არა აქვს მიღებული, თავს ვალდებულად ვთვლი, გავაჟღერო ინფორმაცია,რაც მაქვს, ვინაიდან მე ვარ ვენეციის კომისიასთან საკონტაქტო პირი. მაქვს მეილი, სადაც ტომას მარკერტი მიდასტურებს, რომ როგორც კი დასკვნა პარლამენტის თავმჯდომარეს გაეგზავნა, ასევე გაეგზავნა საქართველოს პრეზიდენტს“, - განაცხადა ჩუგოშვილმა იურიდიულ საკითხთა კომიტეტის სხდომაზე.

შეგახსენებთ, საქართველოს პარლამენტის თავმჯდომარის, ირაკლი კობახიძის განცხადებით, ვენეციის კომისიის წინასწარი დასკვნა პარლამენტის ხელმძღვანელობამ და საქართველოს პრეზიდენტმა მიიღეს. მან ასევე აღნიშნა, რომ კომისიის მოთხოვნა იყო, დოკუმენტი არ გასაჯაროვებულიყო, თუმცა გუშინ დასკვნა მედიაში გავრცელდა.

ანა მებურიშვილი