პოლიტიკა

მივმართავთ სასამართლოს, რათა სააკაშვილისთვის უკრაინის მოქალაქეობის ჩამორთმევის გადაწყვეტილება უკანონოდ გამოაცხადოს - სააკაშვილის ადვოკატი

საქართველოს ექს-პრეზიდენტის, ოდესის ყოფილი გუბერნატორის მიხეილ სააკაშვილის ადვოკატმა ნიკოლაი ნიდილკომ განაცხადა, რომ ისინი სარჩელს შეიტანენ სააკაშვილისთვის უკრაინის მოქალაქეობის ჩამორთმევის გადაწყვეტილების წინააღმდეგ. - ამის შესახებ ადვოკატმა 1tv.ge-ის განუცხადა.

ნიდილკოს თქმით, ეს პოლიტიკური დაკვეთაა და მაღალჩინოსნებმა სააკაშვილთან მიმართებით საკუთარი უფლებამოსილებები ბოროტად გამოიყენეს.

„ადვოკატთა ჯგუფმა უკვე დავიწყეთ მუშაობა ამ ინფორმაციის გადასამოწმებლად. უამრავი მიმართვა მოვამზადეთ სხვადასხვა ინსტანციისთვის, მათ შორის ჩვენ მივმართეთ გენერალურ პროკურატურას, პრეზიდენტის ადმინისტრაციას. ჩვენ გავრცელებული ინფორმაციის დადასტურებას ველოდებით. უკვე მზადდება სარჩელები, მივმართავთ სასამართლოს, რათა პრეზიდენტის, საიმიგრაციო სამსახურისა და გენერალური პროკურატურის ეს ქმედება უკანონოდ გამოცხადდეს, რადგან მთელი პროცედურა მიხეილ სააკაშვილისა და მისი ადვოკატების ჩართულობის გარეშე მიმდინარეობდა. ეს ჩვენი შეფასებით, პოლიტიკური დაკვეთაა და მაღალჩინოსნებმა საკუთარი უფლებამოსილება ბოროტად გამოიყენეს“, - განაცხადა ნიდილკომ.

შეგახსენებთ, გუშინ გავრცელებული ინფორმაციით, მიხეილ სააკაშვილს უკრაინის მოქალაქეობა ჩამოართვეს.

ანა მებურიშვილი