საზოგადოება
მსუბუქი ავტომობილების მძღოლებს ავტობუსებისთვის მონიშნულ ადგილებზე გაჩერების შემთხვევაში, შესაძლოა, ჯარიმა გაეზარდოთ
მსუბუქი ავტომობილების მძღოლებს ავტობუსებისთვის მონიშნულ ადგილებზე გაჩერების შემთხვევაში, შესაძლოა, ჯარიმა 10 ლარიდან 50 ლარამდე გაეზარდოთ. აღნიშნულ კანონპროექტზე პარლამენტის საფინანსო-საბიუჯეტო კომოტეტმა პირველი მოსმენით იმსჯელა.
"იზრდება სანქცია, იყო ჩვეულებრივ 10 ლარი და გახდება 50 ლარი, რადგანაც ეს არ არის მხოლოდ არასწორი პარკირება, ეს არის მოძრაობის შეფერხება და ავტობუსებისა და მარშუტკებისთვის, რომლებიც მონიშნულ ადგილებზე უნდა გაჩერდნენ", -განაცხადა კანონპროექტის ინიციატორმა კახა კუჭავამ.
საკანონმდებლო პაკეტში ტრანზიტულად მოძრავი ავტომობილებისთვის ჯარიმის გაზრდაზეცაა საუბარი. ქალაქის ცენტრალურ ქუჩებში გადაადგილების შემთხვევაში სატვირთო და დიდი გაბარიტების მქონე ავტომობილების მძღოლები 20 ლარის ნაცვლად 500 ლარით დაჯარიმდებიან.
შეგახსენებთ, რომ 1 მარტიდან მიკროავტობუსები ვაჟა-ფშაველას, შოთა რუსთაველის, ალექსანდრე ყაზბეგის, დავით აღმაშენებლის, ილია ჭავჭავაძის, მარშალ გელოვანის გამზირებზე, მერაბ კოსტავას, პეტრე მელიქიშვილის, ვახტანგ გორგასლის, ჟიული შარტავას, პეკინის, ჯორჯ ბუშის ქუჩებზე, ასევე, დავით აღმაშენებლის ხეივანსა და კახეთის გზატკეცილზე მხოლოდ გაჩერებებზე ჩერდებიან.