კომენტარი

მთავრობა დგამს ისეთ ნაბიჯს, რომელიც აძლიერებს ამ ეკონომიკურ კრიზისს - ზურაბ ჭიაბერაშვილი

,,ევროპული საქართველოს’’ წევრი ზურაბ ჭიაბერაშვილი საგარეო ვაჭრობის შესახებ საქსტატის მიერ გამოქვეყნებულ მონაცემებს ბრიფინგით გამოეხმაურა.

ზურაბ ჭიაბერაშვილის განცხადებით, ექსპორტ-იმპორტი შემცირებულია და 6 წლის წინანდელ ნიშნულს დაუბრუნდა, რაც მოსახლეობის კიდევ უფრო გაღარიბებას გამოიწვევს.

დეპუტატის განმარტებით, მხოლოდ ექსპორტი გასულ წელს, 2015 წელთან შედარებით, 4%-ით შემცირდა. დეპუტატის განცხადებით, ხელისუფლება პრობლემას არ აღიარებს და შესაბამისად, მისი მოგვარების გეგმა არ აქვს.

„საგარეო ვაჭრობის მაჩვენებლები აჩვენებს, რომ ჩვენ დავედით 2011 წლის მონაცემებზე, რაც იმაზე მიუთითებს, რომ შემცირდა ჩვენი მოქალაქეების მსყიდველუნარიანობა. იმის საპასუხოდ, რომ უკან მივექანებით, საქართველოს მთავრობა დგამს ისეთ ნაბიჯს, რომელიც, პირიქით, აძლიერებს ამ ეკონომიკურ კრიზისს. ჩვენ დღესაც ვამბობ, რომ ასეთ ეკონომიკურ კრიზისში გამოსავალი არის გადასახადების შემცირება და არა გადასახადების გაზრდა, როგორც ეს გააკეთა ბიძინა ივანიშვილის მთავრობამ“ - აცხადებს ზურაბ ჭიაბერაშვილი.

ნინო ექვთიმიშვილი