რეგიონები

მცხეთა-მთიანეთში „არაგველობა 2018“ აღინიშნა

დუშეთის მუნიციპალიტეტის სოფელ ქვეშეთის ახალგაზრდების ინიციატივით, კრწანისის ბრძოლის 300 არაგველი გმირის ხსოვნის პატივსაცემად, „არაგველობა 2018“ გაიმართა. ღონისძიება უკვე მესამე წელია ტარდება და ქართული სიმღერის, ცეკვის, საბრძოლო ხელოვნების ჩვენების ფონზე მიმდინარეობს.

ეს დღე, შეკრებილ საზოგადოებასთან და ხელისუფლების სხვა წარმომადგენლებთან ერთად, მცხეთა-მთიანეთის გუბერნატორმა შალვა კერესელიძემ აღნიშნა. მხარის გუბერნატორის განცხადებით არაგველობა არის დღესასწაული, რომელიც სრულიად საქართველოს მოსახლეობისთვის ერთნაირად მნიშვნელოვანია:

„არაგველობა და კრწანისის ბრძოლა ეს არის საქართველოს ისტორიაში პატრიოტიზმის და სამშობლოს მიმართ თავდადების ერთ-ერთი ყველაზე მნიშვნელოვანი მაგალითი. ვულოცავ არაგველებს და სრულიად საქართველოს დღევანდელ დღეს. ვისურვებდი კიდევ ბევრი ღირსეული არაგველი გაეზარდოს ჩვენს სამშობლოს და არაგვის ხეობას“, - განაცხადა მხარის გუბერნატორმა.

„არაგველობა“ ქვეშეთის მიმდებარე ტერიტორიაზე დიდველზე 300 არაგველის ხატის დაბრძანებით და მოლოცვით დაიწყო.

გაიმართა სხვადასხვა სპორტულ-გასართობი ღონისძიებები, ფოლკლორული ანსამბლების მონაწილეობით შესრულდა მუსიკალური ნომრები.