პოლიტიკა

ნამდვილად არსებობს კონკრეტული ჯგუფი, რომელიც არის ჩემი უშუალო საყრდენი - ირაკლი კობახიძე

ირაკლი კობახიძის განცხადებით, პარლამენტში მას ჰყავს ჯგუფი, რომელსაც ეყრდნობა და ამას ნორმალურ პროცესად მიიჩნევს.

„ნამდვილად არსებობს კონკრეტული ჯგუფი, რომელიც არის ჩემი უშუალო საყრდენი. ესენი არიან პარლამენტის თავმჯდომარის პირველი მოადგილე, პარლამენტის თავმჯდომარის მოადგილეები, უმრავლესობის ლიდერი და ფრაქციის თავმჯდომარე. პარლამენტში პროცესები უნდა წარიმართოს იმ იერარქიის შესაბამისად, რომელიც არის ჩამოყალიბებული. ამას ემატებიან კომიტეტების თავმჯდომარეები, ფრაქციების თავმჯდომარეები და ასე შემდეგ. ეს არის პარლამენტში ნორმალური პროცესი, როდესაც იერარქიის შესაბამისად განისაზღვრება ურთიერთობები. ბუნებრივია, პირველი საყრდენი ჩემთვის არის პირველი მოადგილე, მოადგილეები, უმრავლესობის ლიდერი, ფრაქციის თავმჯდომარე და ეს არ უნდა გახდეს არც ეჭვიანობის და არც არასწორი ინტერპრეტაციის საფუძველი“,- უთხრა კობახიძემ ჟურნალისტებს.

მისი თქმით, მმართველ გუნდში დემოკრატიული პროცესი მიმდინარეობს და ყველა დეპუტატს თავისუფლად შეუძლია, თავისი აზრი გამოხატოს.

„ჩვენ უმრავლესობის სხდომების ფორმატში ურთიერთობა 116-ვე დეპუტატთან გვაქვს. ამ კუთხითაც დისკუსიის ნაკლებობა არ გვაქვს. მე მიმოვიხილე დაახლოებით 20 გადაწყვეტილება, საკვანძო გადაწყვეტილება, რომელიც მიიღო პარლამენტმა გასული წელიწად-ნახევრის განმავლობაში და ოცივე საკითხთან დაკავშირებით გვქონდა სიღრმისეული განხილვა უმრავლესობის ფორმატში. თითოეულ დეპუტატს ჰქონდა საკუთარი პოზიციის დაფიქსირების საშუალება. უფრო მეტიც, ჩვენთან არის ძალიან დემოკრატიული პროცესები და ხშირად ტარდება თავისუფალი კენჭისყრები, მაგალითად, თავისუფალი კენჭისყრა ჩატარდა კვოტირებასთან დაკავშირებით, ნინია კაკაბაძის არჩევასთან დაკავშირებით და ესეც ბუნებრივია, შიდაპარტიული, დემოკრატიული პროცესის ნაწილია“, -აღნიშნა კობახიძემ.

ინფორმაცია უმრავლესობაში არსებული დაპირისპირების შესახებ მას შემდეგ გაჩნდა, რაც გედევან ფოფხაძემ საზოგადოებრივი მაუწყებლის სამეურვეო საბჭოში ნინია კაკაბაძის არჩევის გამო მმართველი გუნდის დატოვების გადაწყვეტილება მიიღო.