საზოგადოება
ნარკოტიკი ადამიანს პირდაპირ ამზადებს ეშმაკთან ურთიერთობისთვის - დეკანოზი დავით ქვლივიძე
საკონსტიტუციო სასამართლოს გადაწყვეტილება არის ანტისახელმწიფოებრივი და ანტიეროვნული გადაწყვეტილება. ამით ფაქტობრივად ერის განადგურება მოხდება, - ასე ეხმიანება დეკანოზი, დავით ქვლივიძე მარიხუანას მოხმარებაზე სანქციების გაუქმებას.
როგორც დეკანოზმა დღეს გამართულ პრესკონფერენციაზე განაცხადა, ნარკოტიკები სულიერ დეგრადირებასა და ფიზიკურ განადგურებას იწვევს.
„ნარკომანია არის სატანიზმის ერთ-ერთი შემადგენელი ნაწილი. სატანის რიტუალის მთავარი ნაწილია. როგორც მარხვა და ლოცვა ამზადებს ადამიანს წმინდა ზიარებისთვის, ნარკოტიკი ადამიანს პირდაპირ ამზადებს ეშმაკთან ურთიერთობისთვის. ეს იწვევს ადამიანის როგორც სულიერ დეგრადირებას, ასევე ფიზიკურ განადგურებას. არამარტო პიროვნების, არამედ მთელი ერების", - განაცხადა დეკანოზმა.
დეკანოზი ასევე გამოეხმაურა იმ მოსაზრებას, რომ თუ ღვინო დაშვებულია, მარიხუანაც დაშვებული უნდა იყოს და აღნიშნა, რომ ღვინო არაა შემამსუბუქებელი გარემოება, პირიქით, დანაშაულის ჩადენისას ის დამამძიმებელი გარემოება ხდება.
"ღვინო მაღაზიაში იყიდება, მაგრამ დალიე და დაჯექი საჭესთან - ჩამოგართმევენ მართვის უფლებას. აბა ნასვამმა ჩაიდინე დანაშაული, ორჯერ უფრო მძიმე დანაშაულია. ღვინო შემამსუბუქებელი კი არა დამამძიმებელი გარემოებაა. ასე უნდა გაკეთდეს ნარკოტიკზეც. ნარკოტიკის ზემოქმედების ქვეშ ადამიანს საჭესთან თუ დაიჭერ, აუცილებლად უნდა აუკრძალო მართვა, ასევე, არ შეიძლება სამხედრო პირი იყოს ნარკოტიკის ზემოქმედების ქვეშ", - განაცხადა დეკანოზმა დავით ქვლივიძემ.
მისივე თქმით, საკონსტიტუციო სასამართლომ ანტისახელმწიფოებრივი გადაწყვეტილება მიიღო.
„საკონსტიტუციო სასამართლოს გადაწყვეტილება არის ანტისახელმწიფოებრივი და ანტიეროვნული. ამით ფაქტობრივად ერის განადგურება მოხდება. როგორც სერგო ორჯონიკიძე და ფილიპე მახარაძე წითელ არმიას მოუძღოდნენ წინ, დაიპყრეს და გაანადგურეს, ესენი სულიერად ანადგურებენ", - განაცხადა დეკანოზმა.
ნინო ექვთიმიშვილი