კომენტარი
ნატო ჩხეიძე: იყოს, იყოს და გაისმოდეს ეს “თერმოსკრინინგი”, მით უფრო “პროაქტიური” თუა...
პარლამენტის დამოუკიდებელი დეპუტატი ნატო ჩხეიძე სოციალურ ქსელში წერს:
„სერიიდან: იყოს, ისმოდეს...
ტრიბუნიდან , რომელსაც აწერია შტოპჩოV.გე რომ მოისმენ ასეთ ფრაზას: “...საქართველოს მთელს ტერიტორიაზე მიმდინარეობს პროაქტიური თერმოსკრინინგი”, დამამშვიდებელი ტალღა გადაუვლის შენს სახესა და სულს, რადგან ეს “თერმო” და “სკრინინგი”, თანაც “პროაქტიური”, მთელს ტერიტორიაზე რომ მიმდინარეობს, ეს უცხო რამ სიტყვები მალამოსავით გედება;
დამცავი ფარივითაა, შენი ქვეყნის მთავრობა და ხელისუფლება მოსახლეობის ჯანმრთელობისთვის პროაქტიურ თერმოსკრინინგს ქვეყნის მთელს ტერიტორიაზე რომ ატარებს. .
ჰოდა, უმუშევრობით გამოწვეული ნერვიულობა, გადაუხდელი გადასახადების (კომუნალური თუ ბანკის თუ სხვა მსგავსი თუ უმსგავსის ) გამო შეშფოთება, თვითიზოლაციისა თუ საგანგებო რეჟიმისაგან გამოწვეული საყოველთაო ფსიქოლიგიური ტრავმა, ქვეყნის ეკონომიკის უცილობელი ჩამორჩენა და შენი პირადი თუ საზოგადოდ ქვეყნის სამომავლო ყოვლად უამური პერსპექტივის წარმოდგენა სულ უკანა- უკან იწევს, ლამის კიდეც ხუნდება და ყურში საამურად გეღვრება დამაიმედებელი სიტყვები: “პროაქტიური თერმოსკრინინგი”.
აბა რატომღა გაგანდობთ, მეგობრებო და ნაცნობ- უცნობებო, რომ ეს ფრაზა ადამიანურ ენახე თერმომეტრით სიცხის გაზომვაა, სულ ეგ არის, გეფიცებით, თერმომეტრის შუბლთან მიტანაა, ეგ არის და ეგ!..
მაგრამ როგორ მაგიურად ჟღერს, როცა ამას ამბობ ტრიბუნიდან, შტოპჩოV.გე რომ აწერია...
ამიტომაც იყოს, იყოს და გაისმოდეს ეს “თერმოსკრინინგი”, მით უფრო “პროაქტიური” თუა...“ - დაწერა ნატო ჩხეიძემ.