კომენტარი

ნებისმიერი რეზოლუცია, რომელიც მხარს უჭერს დევნილთა დაბრუნებას სახლებში, ვერ შეუშლის ხელს ჟენევის ფორმატს - იან კელი

ამერიკის შეერთებული შტატები მხარს უჭერს ჟენევის ფორმატს, რადგან იგი არის დისკუსიების ძირითადი ადგილი, სადაც მხარეები კონფლიქტის მოგვარების საკითხებზე მსჯელობენ, - ასე ეხმაურება საქართველოში აშშ-ს ელჩი გაერო-ს გენერალურ ასამბლეაზე რუსი დიპლომატის განცხადებას, რომელმაც საქართველოს ოკუპირებული ტერიტორიებიდან იძულებით დევნილთა მხარდასაჭერი რეზოლუცია გააპროტესტა და აღნიშნა, რომ იგი ჟენევის მოლაპარაკებების ფორმატის ეფექტიანობას ეჭვქვეშ აყენებს.

იან კელის თქმით, ნებისმიერი რეზოლუცია, რომელიც მხარს უჭერს დევნილთა დაბრუნებას სახლებში, ვერ შეუშლის ხელს ამ ფორმატს.

,,შესაბამისად, მტკიცება,თითქოს რეზოლუცია რამენაირად ეჭვქვეშ აყენებს ჟენევის მოლაპარაკებებს, არასწორია და არ ვეთანხმები’’, - განაცხადა აშშ-ს ელჩმა.

იან კელი მიესალმება გაერო-ს გენერალური ასამბლეის 71-ე სესიაზე რეზოლუციის მხარდამჭერთა რაოდენობის ზრდას და აღნიშნავს, რომ შტატები დევნილების პრობლემების მოგვარების ყველა შესაძლო გზას დაუჭერს მხარს.

"ძალიან კარგია, რომ ამ რეზოლუციის მხარდამჭერთა რაოდენობა გაიზარდა. ვფიქრობ, უაღრესად მნიშვნელოვანია, გავაგრძელოთ ყურადღების გამახვილება იმ სიძნელეებზე, რასაც იძულებით გადაადგილებული პირები აწყდებიან საქართველოში. მათ მოუწიათ საკუთარი საცხოვრებლის დატოვება, სადაც მათი ოჯახები, თაობები ცხოვრობდნენ. ჩვენ, ამერიკის შეერთებული შტატები ყველაფერს გავაკეთებთ, რომ დავუჭიროთ მხარი რეზოლუციას ამ კონფლიქტის და საქართველოს ტერიტორიული მთლიანობის აღდგენას, იმისათვის, რომ დევნილებს ჰქონდეთ საკუთარ საცხოვრებელ ადგილებზე დაბრუნების შესაძლებლობა" - აღნიშნა იან კელიმ.

ნინო ექვთიმიშვილი